У Язненскай СШ завяршыўся месячнік ваенна-патрыятычнай работы. Ён уключаў шэраг мерапрыемстваў, першым з якіх стала ўрачыстая лінейка з удзелам воіна-інтэрнацыяналіста М. Лушчыка.

На працягу месяца вучні і педагогі прымалі ўдзел у патрыятычнай акцыі «Памятаем, смуткуем, ганарымся» па ўборцы снегу ля абеліскаў, месц пахаванняў ахвяр Вялікай Айчыннай вайны і воінаў-афганцаў.

Праведзены сустрэча з ваенным камісарам раёна Сяргеем Пляшковым, збор піянерскай дружыны «Захоўваем гісторыю, захоўваем памяць», прысвечаны Дню памяці герояў-антыфашыстаў, «Сустрэча на ўсе 100!» з дырэктарам Язненскай ПМК, воінам-афганцам Пятром Баслаком, урокі мужнасці.

У школьнай бібліятэцы, музейным пакоі, фае ладзіліся тэматычныя выставы «Вечны агонь нашай памяці», «Генацыд беларускага народа ў гады Вялікай Айчыннай вайны», «Сыны». Вучні паўдзельнічалі ў экскурсіях «Дарогамі Перамогі» ў Міёрах, Цэнтры бяспекі г. Наваполацка.

Правядзенне Тыдня беларускай мовы і літаратуры «Гучы, наша роднае слова!» садзейнічала абуджэнню цікавасці вучняў да беларускай мовы, літаратуры і  культуры беларускага народа.

Дзеці прынялі ўдзел у конкурсах «Школа бяспекі», «Прывітанне салдату», «Нам мір завяшчана берагчы», «Я – патрыёт сваёй краіны» ў рамках культурна-адукацыйнай патрыятычнай акцыі «Поезд Памяці» і інш. Юлія Альхімовіч, Дзмітрый Семяняка, Антон Шчарбіцкі атрымалі граматы і дыпломы.

Да Дня абаронцаў Айчыны і Узброеных Сіл Рэспублікі Беларусь старшакласнікі стварылі і размясцілі ў бацькоўскіх чатах віртуальную паштоўку.
Хочацца спадзявацца, што мерапрыемствы, якія праводзяцца ва ўстанове адукацыі, будуць садзейнічаць фарміраванню ў моладзі актыўнай грамадзянскай пазіцыі, нацыянальнай самасвядомасці, пачуцця гонару за сваю краіну.Наталія КОРСАК,
кіраўнік па ваенна-патрыятычным выхаванні.