Выстава «Нам жыць і памятаць», прымеркаваная да Дня Перамогі, дзейнічае ў Цвецінскай бібліятэцы. Да ўвагі наведвальнікаў – фотаздымкі, пісьмы з фронту, тэматычная літаратура.

– Выстава арганізавана ў рамках праекта «Гартаючы гісторыі старонкі», – заўважае бібліятэкар Таццяна Базылева. – Рэалізацыя праекта распачалася сёлета і прадоўжыцца ў наступныя гады. У бібліятэцы захоўваюцца арыгінальныя франтавыя пісьмы ўраджэнца Кранштадта, маёра Ігара Пацёміна, які загінуў у нашай мясцовасці падчас вызвалення раёна і пахаваны на могілках у Копцева; даследчыя работы вучняў былой Цвецінскай сярэдняй школы і іншыя матэрыялы краязнаўчай тэматыкі. Ім знойдзецца прымяненне ў далейшай рабоце.

Менавіта Ігару Пацёміну прысвечаны асобны блок выставы. Змешчаны пісьмы, фотаздымкі, успаміны яго стрыечнага брата. Другі блок – дакументальная літаратура. У тым ліку выданне «Шталаг № 354», дзе сабрана інфармацыя пра масавую гібель савецкіх ваеннапалонных у шталагу на тэрыторыі ваеннага гарадка Баравуха-1.

– Спадзяюся, выстава зацікавіць як дарослых чытачоў, так і дзяцей, – гаворыць бібліятэкар. – Матэрыяльную дапамогу ў падрыхтоўцы экспазіцыі аказаў старшыня Завуццеўскага сельвыканкама Святаслаў Паніч, ідэйным натхняльнікам стала старэйшына вёскі Цвеціна Ія Яленская. Вялікі дзякуй за дапамогу і падтрымку!