Адна з вуліц Міёр носіць імя Героя Савецкага Саюза Льва Даватара. Ён вядомы паспяховымі аперацыямі па знішчэнні войскаў праціўніка ў пачатку Вялікай Айчыннай вайны.

Леў Даватар(на фота справа) нарадзіўся 20 лютага 1903 года ў сяле Хоціна Віцебскай губерні. Скончыў царкоўна-прыхадскую школу, працаваў у Віцебску на ільнопрадзільнай фабрыцы. У 1922 годзе абраны сакратаром Хоцінскага валаснога камітэта камсамола, а затым сакратаром сельскага камітэта беднаты.

Скончыў кавалерыйскую школу, затым Ваенную акадэмію імя Фрунзе. У сакавіку 1941 года прызначаны на пасаду начальніка штаба 36-й кавалерыйскай дывізіі. У першы дзень вайны яна здзейсніла 70-кіламетровы марш у раён Беластока, 23-24 ліпеня з часцямі 6-га мехкорпуса скоўвала сілы чатырох пяхотных дывізій вермахта. З раніцы 25 ліпеня кавалерысты трапілі пад шматгадзінную авіяцыйную бамбардзіроўку, а да вечара атрымалі загад адыходзіць на ўсход. Падчас наступных баёў дывізія была разбіта, а затым канчаткова расфарміравана.

У першыя дні Вялікай Айчыннай палкоўнік Даватар знаходзіўся на лячэнні ў шпіталі ў Маскве, таму ў сваю дывізію, якая трапіла ў акружэнне пад Гродна, не змог дабрацца. Хутка быў залічаны ў распараджэнне штаба Заходняга фронту.

У ліпені 1941 года за заслугі ў абараняльных баях на Салаўёўскай пераправе праз Днепр узнагароджаны ордэнам Чырвонага Сцяга. Некаторыя ваенныя гісторыкі лічылі, што не толькі за гэтыя баі, але і за дачыненне да першага баявога залпу «кацюш» батарэі капітана Флерава па скапленні нямецкіх саставаў у Оршы. У прадстаўленні на ўзнагароджванне гаварылася, што ён выканаў адказныя задачы Галоўнакамандуючага па перадачы аператыўнага загада злучэнням, а таксама па дастаўцы боепрыпасаў на перадавыя пазіцыі.

У жніўні 1941-га прызначаны камандуючым асобнай кавалерыйскай групы, якая з 14 жніўня па 2 верасня здзейсніла рэйд па тыле праціўніка на тэрыторыі Смаленскай вобласці. У лістападзе камандаваў і 3-м кавалерыйскім корпусам, які за баявыя заслугі хутка перайменавалі ў 2-і гвардзейскі. Ён сумесна са стралковай дывізіяй Панфілава і танкавай брыгадай Катукова абаранялі на валакаламскім накірунку подступы да Масквы.

11 снежня корпус пад камандаваннем Даватара быў перадыслакаваны пад Маскву і пасля рэйда выйшаў да ракі Рузе. Пры аглядзе ў бінокль пазіцый праціўніка перад боем генерал-маёр Даватар быў паранены кулямётнай чаргой. Указам Прэзідыума Вярхоўнага Савета СССР яму прысвоена пасмяротна званне Героя Савецкага Саюза.

Падрыхтавала Алена ВАРОНІНА.
Фота з адкрытых крыніц.