У цесным супрацоўніцтве

Да Дня банкаўскіх і фінансавых работнікаў

Асноўныя кліенты міёрскага аддзялення ААТ “Белаграпрамбанк” — гэта прамысловыя і сельскагаспадарчыя прадпрыемствы. Таксама тут аказваецца падтрымка ў вядзенні малога і сярэдняга бізнесу, абслугоўваюцца фізічныя асобы.

Для апошніх ёсць выгадныя прапановы па зберажэннях: грашовыя ўклады, сертыфікаты, аблігацыі.

Прадпрыемствам аграпрамысловага комплексу раёна аказваецца пастаянная фінансавая падтрымка. Як расказала ўпраўляючы аддзялення Ала Стэфанаўна Дуброўская, па стане на 1 снежня крэдытны партфель складае 186 мільярдаў рублёў. За кошт крэдытных рэсурсаў у ААТ “Пад’ельцы” зараз вядзецца будаўніцтва малочна-таварнай фермы. Аналагічны аб’ект у ААТ “Цітова” ўжо ўведзены ў эксплуатацыю.

“Хочацца выказаць падзяку кліентам нашага банка за супрацоўніцтва, а таксама кіраўніцтву раёна за дапамогу ў вырашэнні розных пытанняў, — гаворыць А. С. Дуброўская. — Спадзяёмся на далейшае плённае супрацоўніцтва і дасягненне пастаўленых мэт у новым годзе”.

На здымку: упраўляючы аддзялення ААТ “Белаграпрамбанк” г. Міёры А. С. Дуброўская з супрацоўнікамі аддзела кліенцкага менеджменту.