З 1 жніўня на пасаду дырэктара дзяржаўнай установы культуры «Міёрская цэнтралізаваная бібліятэчная сістэма» прызначана Анастасія Міхайлаўна Драба.

Анастасія Драба нарадзілася ў 1990 годзе. Дзяцінства прайшло ў вёсцы Клётаў Двор. Вучылася ў Чапукоўскай СШ.

Прафесію бібліятэкара са спецыялізацыяй «дзіцячыя і юнацкія бібліятэкі» атрымала на факультэце інфармацыйна-дакументных камунікацый Беларускага дзяржаўнага ўніверсітэта культуры і мастацтваў.

Працоўную дзейнасць у 2015 годзе пачала ў аддзеле камплектавання Міёрскай цэнтральнай бібліятэкі. У 2016-м перавялі ў дзіцячую бібліятэку, дзе працавала бібліятэкарам, а ў 2020 годзе ўзначаліла ўстанову. У цэнтральную бібліятэку вярнулася сёлета ў лютым на пасаду намесніка дырэктара.

– У структуры цэнтралізаванай бібліятэчнай сістэмы 16 бібліятэк, з іх 13 – сельскія. У калектыве 34 супрацоўнікі, з іх 15 заняты ў цэнтральнай бібліятэцы. У бліжэйшых планах – закупка і арганізацыя работы бібліёбуса, які будзе курсіраваць па вёсках, дзе няма бібліятэк, – заўважае дырэктар. – Цяпер ідзе планавы рамонт у будынку цэнтральнай бібліятэкі. Пасля завяршэння работ дзейнасць установы прадоўжыцца ў штатным рэжыме. Будуць праходзіць мерапрыемствы рознай тэматыкі, сустрэчы з цікавымі людзьмі. Канешне, прымем удзел у абласным фестывалі-кірмашы «Дажынкі», што сёлета прымае наш горад.

Новы кіраўнік унікае ў курс спраў. На думку Анастасіі Міхайлаўны, спраўляцца з шырокім колам абавязкаў ёй дапаможа ўменне акцэнтаваць увагу на пазітыўных момантах і вырашаць складанасці па меры іх узнікнення.

У кругазвароце службовых клопатаў важна пакідаць час для сям’і. Разам з мужам выхоўваюць дзвюх дачок. Старэйшая перайшла ў дзясяты клас, малодшая наведвае дзіцячы сад.