У рамках месячніка “Белы кій” 20 кастрычніка ў Віцебску адбыўся абласны конкурс па элементарнай рэабілітацыі інвалідаў па зроку. Міёрскую пярвічную арганізацыю грамадскага аб’яднання таварыства прадстаўляла Сафія Гуз з Узмён. Яна з’яўляецца інвалідам І групы.

Абавязковай умовай для ўдзелу ў конкурсе з’яўлялася ўменне працаваць на камп’ютары, пісаць і чытаць рэльефна-кропачным шрыфтам, валодаць элементарнымі навыкамі сацыяльна-бытавога арыентавання з дапамогай кія. Сафія ўмела выканала ўсе ўмовы конкурсу. І ёй было прысуджана ганаровае трэцяе месца ў катэгорыі В-1 (людзі, якія не выкарыстоўваюць зрок у сваёй жыццядзейнасці).

Дарэчы, у час конкурсу Сафія праявіла сябе вельмі ўмела, яна была адкрытая, камунікабельная. Гэта прыцягнула ўвагу не толькі ўдзельнікаў і журы, але і карэспандэнтаў. Віцебскае абласное тэлебачанне стварыла рэпартаж з удзелам Сафіі Гуз, які трансліраваўся ў гэты дзень.

Несумненна, удзел чалавека з абмежаваннямі ў такіх мерапрыемствах неабходны як самому інваліду па зроку, так і людзям, якія знаходзяцца побач. Гэта дапамагае зразумець, што няма нічога немагчымага, што жыццё не заканчваецца, калі ўсё здаецца безнадзейным і цьмяным. Галоўнае—знайсці сілы для перамог над сабой... на кожны дзень.

Л. БАТАРЧУК,

старшыня раённай пярвічнай

арганізацыі ГА “Бел ТІЗ”.