Нетрадыцыйна пачаўся ўрачысты сход грамадскасці райцэнтра 7 сакавіка напярэдадні Міжнароднага свята жанчын. Яго ўдзельніц і ўдзельнікаў сустракаў цудоўнымі мелодыямі ў танцзале баянна-акардэонны ўзорны аркестр выхаванцаў школы мастацтваў пад кіраўніцтвам Ігара Лаўца. А ўрачыстасць адкрылі вершаванымі прывітаннямі дзеткі-дзетсадаўцы.

Відэафільм расказаў пра мясцовых прадстаўніц цудоўнай паловы, якім сёлета прысвоена ганаровае званне “Жанчына года Міёршчыны”. Гэта старшы майстар камбікормавага завода Таліна Аляксандраўна Масіёнак, медсястра Наталля Дзмітрыеўна Кавалеўская, загадчыца фермы ААТ “Туркова” Ларыса Пятроўна Насаль, намеснік дырэктара Туркоўскай СШ Тамара Анатольеўна Равецкая, дырэктар Дзісенскага ГЦК Галіна Дзмітрыеўна Мялешка. Не толькі да іх, да ўсіх слаўных дачок, маці і бабуль раёна са словамі прывітання звярнуўся старшыня раённага выканаўчага камітэта Ігар Валер’евіч Кузняцоў. Намінанткам ён уручыў адпаведныя дыпломы, букеты кветак і падарункі.

А затым пачаўся святочны канцэрт. На ім спявалі Вольга Чапулёнак, Аляксей Конах, Лада і Каця Сушко, Дзіна Юдзіцкая, жаночая вакальная група, танцаваў харэаграфічны калектыў школы мастацтваў... Усе нумары былі цудоўна падрыхтаваны і адзначаны гарачымі апладысментамі гледачоў.

Леанід МАТЭЛЕНАК.