У лячэбна-працоўныя прафілакторыі ў большасці накіроўваюць мужчын старэй за 40 год, якія нідзе не працуюць, і жанчын ад 24 да 40, што з’яўляюцца абавязанымі асобамі.

На сумесным пасяджэнні калегіі пракуратуры Віцебскай вобласці і прэзідыума абласнога суда разгледзелі вынікі работы па накіраванні грамадзян у лячэбна-працоўныя прафілакторыі. 

ЛПП — абмежавальная мера, скіраваная на пераадоленне алкагольнай залежнасці, і спосаб абароны правоў грамадзян, якім ствараюць непрыемнасці аматары спіртнога. У прафілактыцы правапарушэнняў, што ўчыняюць схільныя да злоўжывання алкаголем асобы, прымусовая ізаляцыя ў ЛПП мае важную ролю.

Згодна з Законам “Аб парадку і ўмовах накіравання грамадзян у лячэбна-працоўныя прафілакторыі і ўмовах знаходжання ў іх”, туды трапляюць хворыя на хранічны алкагалізм, якія сістэматычна парушаюць грамадскі парадак, правы іншых грамадзян. Таксама ў ЛПП накіроўваюць абавязаных асоб, якія парушаюць працоўную дысцыпліну з-за злоўжывання алкаголем.

Выяўляюць такіх грамадзян, рыхтуюць матэрыялы органы ўнутраных спраў.

Спецыяльныя медкамісіі ўстанаўліваюць, ці хварэе кандыдат у ЛПП на хранічны алкагалізм, ці мае патрэбу ў прымусовай ізаляцыі і медыка-сацыяльнай рэадаптацыі, ці ёсць у яго захворванні, з якімі ў ЛПП нельга. Рашэнне аб накіраванні ў лячэбна-працоўны прафілакторый прымаюць суды.

ГРАМАДЗЯНЕ, што трапілі ў ЛПП, учынялі дробнае хуліганства, распівалі спіртныя напоі ў грамадскіх месцах, знаходзіліся на працы ў стане алкагольнага ап’янення. Звычайна ад іх учынкаў пакутавалі члены сям’і, блізкія, суседзі.

Некаторыя спрабавалі кадзіравацца. Аднак гэта яшчэ не страхоўка ад лячэбна-працоўнага прафілакторыя. Трэба не ўжываць алкаголь на працягу года, належным чынам паводзіць сябе ў быце і на працы.

Як падкрэсліў на нарадзе Савета Бяспекі кіраўнік дзяржавы, кожны чалавек у краіне павінен адчуваць сябе абароненым ад злачынстваў. Без гэтага нельга гаварыць аб прававым дабрабыце грамадства. Разам з тым меры па папярэджанні гвалту ў сям’і і бытавой злачыннасці недастатковыя. Работа па своечасовым выяўленні схільных да злоўжывання алкаголем і ўчынення правапарушэнняў асоб павінна весціся актыўна і наступальна.

Фота для ілюстрацыі.
Ірына ТАЎТЫН, пракурор

па наглядзе за адпаведнасцю

закону судовых пастаноў па

грамадзянскіх справах

пракуратуры Віцебскай вобласці.