Для ста васьмі супрацоўнікаў раённага аддзела па надзвычайных сітуацыях 25 ліпеня — чырвоная дата ў календары. 

Для тых, хто ў восем раніцы змяніўся з сутачнага каравула, сёння выхадны. Тым, хто заступіў на пасты, трэба несці службу, не зважаючы на асаблівы дзень. Пастаянна ў раёне ў двух пажарна-выратавальных часцях і на пяці пастах дзяжураць дваццаць чатыры выратавальнікі. Без замару-джвання гатовы прыбыць туды, дзе агонь перавысіў свае паўнамоцтвы.

Змагацца з вогненнай стыхіяй — не адзіны абавязак выратавальнікаў. На 101 тэлефануюць, калі па-суседству пасяліліся шэршні ці восы, затапіла падвал, заснежыла дах, забралася ў вентшахту кошка і так далей. Профіль шырокі. Для міёрскага аддзела па надзвычайных сітуацыях найбольш актуальны агонь.

Як расказаў начальнік РАНС Сяргей Слізень, па стане на 18 ліпеня ў раёне здарылася 16 пажараў. На такую ж дату мінулага года іх было сем. Здавалася б, мяккая зіма і халоднае лета павінны быць выратавальнікам на руку. Атрымліваецца інакш. Ад плюсаў і мінусаў на тэрмометры залежыць няшмат.

—Ёсць рызыка, што ў моцны мароз гаспадары перацепляць печы, а ў спякоту загарыцца сухая трава. Аднак у 45% выпадкаў вінаваты чалавек і першая прычына пажараў—неасцярожнае абыходжанне з агнём,—заўважае Сяргей Уладзіміравіч.—Паболела ўзгаранняў з-за няспраўных электраправодак, падаўжальнікаў, бытавой тэхнікі. Не ў кожнага гаспадара ёсць сродкі на новы халадзільнік ці пральную машыну.

Калі выратавальнікі дзяжураць на пастах, супрацоўнікі інспекцыі нагляду і прафілактыкі стукаюцца ў дамы і кватэры. Каб нагадаць гаспадарам пра аўтаномны пажарны апавяшчальнік, металічны ліст перад дзверцамі печы, спраўную праводку і шмат чаго іншага. Найперш наведваюць сем'і з непаўналетнімі дзецьмі, асабліва нядобранадзейныя, інвалідаў і пенсіянераў, што пражываюць адны. Паўтарэнне правіл пажарнай бяспекі не бывае лішнім.

У раённым аддзеле па надзвычайных сітуацыях сто восем супрацоўнікаў. Штат укамплектаваны і паступова мяняецца. На заслужаны адпачынак у мінулым годзе праводзілі васьмярых калег, з некаторымі развітаюцца сёлета. 

Словы віншавання з прафесійным святам начальнік аддзела Сяргей Слізень адрасуе ўсяму асабоваму і ветэранскаму саставу:

— Віншую з Днём пажарнай службы і ў першую чаргу хачу пажадаць моцнага здароўя і надзейнага тылу, дабрабыту і бадзёрасці. Каб выратавальнікі ўмацоўвалі свой прафесіяналізм на вучэбных занятках і як мага радзей раздаваліся трывожныя званкі. Наша прафесія прэстыжная, з суровай рамантыкай і высокімі патрабаваннямі да псіхалагічнай і фізічнай загартоўкі. У ёй не можа быць выпадковых людзей. Дзякуй усім за службу! 

Кацярына РЫНКЕВІЧ.