Хібы ва ўстанове адукацыі і крадзеж з невыкарыстоўваемага аб'екта

 Кіраўніцтва і педагогі ўстановы дадатковай адукацыі ў Полацкім раёне незаконна атрымлівалі і выкарыстоўвалі бюджэтныя сродкі на выплату заробку ў суме больш за 24 тысячы рублёў. 

Выяўлена, што дырэктар і яго намеснік, а таксама настаўнікі ў 2015-2016 і 2016-2017 навучальных гадах прыпісвалі колькасць наведвальнікаў у журналах індывідуальных і групавых заняткаў. Уключалі ў працэс навучання дзяцей, якія ніколі не займаліся ў іх, тым самым завышалі педагагічную нагрузку больш чым на чатыры гадзіны.

Несапраўдныя звесткі ўносілі ў пратаколы пасяджэння педагагічнага савета, у загады, у расклад заняткаў, дакументы па ўліку бланкаў строгай справаздачнасці, у дзяржаўную статыстычную справаздачнасць. У 2017 годзе дзяўчынцы, якая не наведвала ўстанову на працягу двух апошніх гадоў, выпісалі пасведчанне аб заканчэнні навучання па праграме дадатковай адукацыі.

Вынікі праверкі накіраваны ў праваахоўныя органы. Аддзел следчага камітэта ўжо ўзбудзіў тры крымінальныя справы ў адносінах работнікаў установы дадатковай адукацыі. 

Разарылі, як толькі зачынілі

У сельскай мясцовасці ёсць невыкарыстоўваемыя аб’екты, якія прапануюць патэнцыяльным інвестарам для ўцягнення ў гаспадарчы абарот. Захаваць іх — важная задача.

У ходзе маніторынгу ў Аршанскім раёне ў адной са школ, якую зачынілі ў верасні 2017-га, устаноўлена, што выйшла са строю сістэма цэнтральнага ацяплення, адрэзалі ад труб і склалі ў памяшканні чыгунныя радыятары. Са слоў службовых асоб, такім чынам імкнуліся папярэдзіць размярзанне сістэмы. У майстэрні выявілі два станкі з прыкметамі разукамплектавання. Пры гэтым школу ахоўвае вартаўнік.
Пасля ўмяшальніцтва Камітэта дзяржкантролю вобласці непаладкі выправяць, шкоду кампенсуюць.