На тытул "Міёрскай журавінкі" прэтэндавалі Ганна Кураш, Анастасія Густава, Васіліна Пянькоўская, Святлана Крук і Вераніка Закрэўская. Сцэна паўвострава ператварылася ў трыдзявятае царства-уладанне ляснога цара. Гаспадар лясны правяраў дзяўчат-прыгажунь у розных выпрабаваннях. Цікава расказаць пра сябе, прыгатаваць смачную страву, паказаць таленты і прадэфеліраваць у авангардных уборах—усе іспыты вытрымалі канкурсанткі і кожная змагла здзівіць.

Творча падышла да візіткі Ганна Кураш. Прадставіла сябе праз уборы на мадэлях: светлая лёгкая сукенка сведчыла пра рамантычнасць натуры і цікавасць да падарожжаў, цёмная строгая адпавядала вобразу вядучай школьных мерапрыемстваў, пышная экстравагантная—гаварыла пра цікаўнасць і імкненне да новых вяршынь. У вершы ўласнага сачынення, прачытанага на конкурсе талентаў, Аня нагадвала, што мары трэба здзяйсняць.

"Ні дня ў смутку"—такі дэвіз спадарожнічае Анастасіі Густавай. Зменлівая, як асення пара, калі з'явілася на свет, Насця імкнецца да дасканаласці ў кожнай справе. Займаецца фотаздымкай і танцамі, глядзіць карэйскае кіно і любіць выпякаць торты. Да кулінарнага конкурсу прыгатавала качку з яблыкамі і журавінавым соусам.

Васіліна Пянькоўская пачаставала журы дэсертам "А-ля журавінка парадзіс" і за некалькі хвілін намалявала партрэт Мэрылін Манро. Пэндзлік і фарбы—неабходнасць юнай мастачкі. Акрамя таго танцуе, спявае і ўмее быць добрай сяброўкай.

Мара Святланы Крук—стаць настаўніцай. Атрымлівае выдатныя адзнакі і актыўнічае ў школьных справах. Добра танцуе і гатуе смачныя бліны з журавінамі. Апошняе пацвердзіць конкурснае журы.

Вераніка Закрэўская размаўляла і спявала на роднай беларускай мове, якую лю-біць і шануе. У вершах расказала пра свае захапленні, сярод якіх рукадзелле, кнігі і спорт. 

Конкурсныя іспыты чаргаваліся з музычнымі паўзамі. Вясёлымі і лірычнымі кампазіцыямі падбадзёрвалі і сагравалі гледачоў Віка Матэленак, Саша Пашкоўская, Насця Дзмітрыева, Віка Савейка, Паліна Казачонак, Дзіяна Маляўка і Дар'я Шук. 

Калі выпрабаванні скончыліся, цар лясны гатовы быў кожнай удзельніцы аддаць перамогу, аднак па ўмовах конкурсу прысуджаюць яе толькі адной. Як заўважыла старшыня журы—галоўны спецыяліст аддзела ідэалагічнай работы, культуры і па справах моладзі Ірына Кубарка, выбіраць "Міёрскую журавінку" складана. Між тым намінацыі і каштоўныя падарункі прадугледжаны для кожнай канкурсанткі.

У выніку: "Таямніца Міёрскага краю"—Вераніка Закрэўская, "Прамяністасць Міёрскага краю" Святлана Крук, "Зачараванне Міёрскага краю"—Васіліна Пянькоўская, "Статнасць Міёрскага краю"—Анастасія Густава. Тытул "Міёрская журавінка-2016" заваявала Ганна Кураш.