Для Евгения Ивашкевича из Миор химия это просто и интересно

 На ўроках хіміі Яўген рашае задачы павышанай складанасці, варыянт кантрольнай работы для яго таксама асобны. З восьмага класа ўдзельнічае ў алімпіядах па прадмеце. 

 

Хіміяй Жэня Івашкевіч захапіўся ў сёмым класе, калі гэты прадмет з’явіўся ў раскладзе ўрокаў. Цікавасць вучня падтрымала настаўніца і класны кіраўнік Алёна Яфімава. Праз год хлопец ужо ўдзельнічаў у абласной дыстанцыйнай алімпіядзе і ўвайшоў у кагорту пераможцаў. Поспехі за дзявяты клас – дыплом ІІІ ступені рэспубліканскай анлайн-алімпіяды, што праходзіла ўпершыню, і такі ж вынік на раённым этапе прадметнай алімпіяды. Сёлета на рэспубліканскай анлайн-алімпіядзе Яўген таксама атрымаў дыплом ІІІ ступені, а на раённым этапе – дыплом І ступені, што стаў пуцёўкай на вобласць.


– У мінулым годзе хацелася праверыць свае сілы, а сёлета паставіў за мэту выйсці ў абласны этап і дасягнуў яе, – заўважае старшакласнік. – Праходзіла алімпіяда ў тры этапы: тэст з 20 пытанняў, на кожнае з якіх шэсць варыянтаў адказу і толькі адзін правільны; пяць задач у тэарэтычным туры, за што можна набраць найбольшую колькасць балаў, і эксперыментальная частка. Хваляваўся больш, чым на раённым этапе. Аднак справіўся і вынікам задаволены.


Поспеху вучня, якому папярэднічала працяглая грунтоўная работа, рада настаўніца.

– Да алімпіяды немагчыма падрыхтавацца, напрыклад, за месяц. Гэта пастаянны працэс, – падкрэслівае Алёна Ігараўна. – З Жэнем займаемся дадаткова ў школе, выконвае заданні дома. Мая галоўная задача ў рабоце з высокаматываваным і зацікаўленым вучнем – рэалізаваць яго патэнцыял і скіраваць усю ўвагу на працэсы асэнсаванага навучання. Матэрыял Жэня асвойвае хутка і без цяжкасцяў.


Акрамя хіміі, падабаюцца Яўгену матэматыка і інфарматыка. Паспявае па ўсіх прадметах. Сярэдні бал за другую чвэрць – 9,4. Падрыхтоўка да ўрокаў патрабуе не адной гадзіны, між тым застаецца час на прагулкі з сябрамі і тэлефільмы. Больш за ўсё ў вольны час падабаецца рашаць задачы па хіміі, якая стала самым большым захапленнем. Будучую прафесію плануе звязаць са сферай нафта- ці хімічнай прамысловасці.


Падрыхтавала Кацярына Рынкевіч.

Фота Казіміра Блажевіча.

0 комментариев

Добавить комментарий

Информация
Комментировать статьи на сайте возможно только в течении 360 дней со дня публикации.