Авторизация
 

Сочыць за парадкам на дарогах Міёршчыны

 Яўген Гарноўскі ў родных Міёрах сочыць за парадкам на дарозе, а бываючы ў Полацку ці Віцебску, абавязкова зазірне ў кнігарню пацікавіцца навінкамі фантастыкі. Форму інспектара дарожна-патрульнай службы прымерыў крыху больш за месяц таму. Прыйшлася па памеры. І новыя абавязкі аказаліся па сілах.

Бліскае маланка. Цёмныя шэрыя хмары нахабна перавышаюць хуткасць. Вось-вось сыпане дождж. У інспектара ДАІ дзяжурства. На капрызы нябеснай канцылярыі паўплываць нельга, а кантраляваць сітуацыю на дарозе – абавязаны.


– Форма не прамакае. І дажджавікі выдаюць. Так што ад ліўню абаронены, – усміхаецца Яўген. – Падчас дзяжурства выязджаем на трасу, сочым за рухам у райцэнтры. У горадзе складаней: вуліцы запоўнены і машынамі, і веласіпедыстамі, і пешаходамі. З ліку апошніх найбольш парушальнікаў на вуліцы Камуністычнай – ігнаруюць пешаходныя пераходы. Частае парушэнне ў вадзіцеляў – перавышэнне хуткасці.


За невялікі час службы Яўген Гарноўскі паспеў выявіць і ліхачоў, і бяспраўнікаў, і нецвярозых за рулём. Заўважае, што ў большасці вадзіцелі адэкватна рэагуюць, калі іх спыняе інспектар ДПС. Некаторыя пачынаюць хвалявацца, іншыя па-добраму ўсміхаюцца. Толькі аднойчы давялося мець справу з грубіянам.


У аддзяленні ДАІ Міёрскага РАУС Яўген працуе з 1 ліпеня. Да гэтага некалькі месяцаў быў міліцыянерам-дзяжурным у ізалятары часовага ўтрымання. Прыйшоў у міліцыю пасля тэрміновай службы ў войсках супрацьпаветранай абароны.


– Патэлефанавалі з раённага аддзела ўнутраных спраў, запрасілі на службу. Прапанова зацікавіла, – расказвае субяседнік. – Па спецыяльнасці я інжынер-электрык. Скончыў Беларускі дзяржаўны аграрны тэхнічны ўніверсітэт. Да арміі працаваў у сельскай гаспадарцы ў Чашніцкім раёне. Плацілі няшмат, часам з затрымкамі. У міліцыі прывабілі стабільны і, на мой погляд, высокі для нашага райцэнтра заробак, сацыяльныя гарантыі. Ды і, па праўдзе сказаць, форма падабалася з дзяцінства. Але паступаць пасля школы ў профільныя вну зусім не думаў.


Курс маладога байца міліцыянер прайшоў за тры месяцы ў вучэбным цэнтры ў Мінску. У лютым мінулага года вярнуўся ў Міёрскі РАУС. Да службовай дысцыпліны, бяссонных начных дзяжурстваў у ізалятары доўга прывыкаць не давялося. Затым прапанавалі перайсці ў аддзяленне ДАІ.


– Тут больш падабаецца, – прызнаецца інспектар. – Ізалятар – замкнутая прастора, акрэсленае кола зносін. Дзяжурствы падобныя адно да другога. На дарозе кожны новы дзень не такі, як мінулы. Розных людзей сустракаеш.


Адпачынак Яўген таксама выбірае разнастайны. Наведвае бабулю ў Волкаўшчыне. Адтуль рукой падаць да лесу, дзе багата ягад і грыбоў. Дома ўключае фантастычныя фільмы. Падабаюцца кнігі ў гэтым жанры. З нядаўна прачытаных запомнілася «Кляймо зоны» Васіля Арэхава і Сяргея Осіпава з серыі «S.T.A.L.K.E.R.» пра небяспечныя прыгоды ў Чарнобыльскай Зоне адчужэння. Сваю бібліятэку інспектар ДАІ пастаянна папаўняе. Калі бывае ў больш буйных гарадах, не пройдзе міма кнігарні.

На службу ў міліцыю запрашаюць маладых людзей ад 18 да 25 гадоў з добрым здароўем і без праблем з законам. Жадаеце папоўніць рады праваахоўнікаў – звяртайцеся ў групу кадраў раённага аддзела ўнутраных спраў. Тэлефануйце 5 19 42.

Фота Казіміра БЛАЖЭВІЧА.

Кацярына РЫНКЕВІЧ.

рейтинг: 
Пакінуць каментар
иконка
Каментаваць артыкулы на нашым сайце магчыма толькі ў плыні 360 дзён з дня публікацыі.
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 24 сентября 2021
Виктор, Герман, Дмитрий, Лев, Николай, Петр, Роман, Сергей, Евдокия, Ия, Карп

Именины 23 сентября 2021
Андрей, Василий, Гавриил, Глеб, Евгений, Иван, Климент, Константин, Николай, Павел, Петр, Татьяна, Семен

Госці краін

free counters
Партнеры сайта