«Белая Русь» абнародавала праект праграмы ствараемай палітычнай партыі. Стартавала масавае грамадскае абмеркаванне.

На сайце «Белай Русі»  дзейнічае сістэма зваротнай сувязі. Яна павінна ўвабраць у сябе пажаданні, бачанне людзей з усіх рэгіёнаў нашай краіны, прадстаўнікоў розных прафесій, відаў дзейнасці, усіх сацыяльных груп і класаў. Ад гэтага залежыць наступная дзейнасць партыі, яе праекты, мэты.

Любы грамадзянін можа даслаць свае прапановы, якія ўлічаць у ходзе падрыхтоўкі выніковага варыянта. На гэтым на калегіі галоўнага ўпраўлення ідэалагічнай работы і па справах моладзі аблвыканкама акцэнтаваў увагу старшыня Віцебскага абласнога Савета дэпутатаў, кіраўнік абласной арганізацыі «Белая Русь», член рэспубліканскага арганізацыйнага камітэта Уладзімір Цярэнцьеў.

Праграма невялікая, адзначыў ён, складаецца з прэамбулы і пяці раздзелаў, якія ахоплі-

ваюць пытанні палітычнага, сацыяльна-эканамічнага развіцця і знешняй палітыкі нашай краіны і даюць на іх аргументаваныя адказы.

На пасяджэнні аргкамітэта ў Мінску падкрэслівалася, што новая партыя з рабочай назвай «Белая Русь» будзе прытрымлівацца цэнтрысцкіх поглядаў. Гэта значыць, падтрымліваць курс Кіраўніка дзяржавы. Пры гэтым у любой палітычнай праграме можна знасці канструктыўныя ідэі для ўзаемадзеяння.

У раздзелах праграмы неаднойчы звяртаецца ўвага на неабходнасць захавання сацыяльнага характару нашай краіны, што адпавядае Канстытуцыі. Яна выступае за тое, каб захоўваліся традыцыйныя нацыянальныя, сямейныя каштоўнасці, рэлігіі. Адной з ключавых задач з’яўляецца фарміраванне кадравага патэнцыялу партыі праз сістэмную работу з моладдзю, стварэнне сацыяльных ліфтаў для таленавітых і дзейных людзей, якія прайшлі школу маладзёжных арганізацый.

Словам, будучая народная партыя намерана захоўваць і развіваць дасягнутае, каб людзі ўпэўнена глядзелі ў будучыню. Як звярнуў увагу Уладзімір Цярэнцьеў, да 18 сакавіка, калі адбудзецца ўстаноўчы з’езд БПП «Белая Русь», належыць сур’ёзна папрацаваць над тэкстам праекта праграмы. У яе абмеркаванні павінен прагучаць голас кожнага рэгіёна.

Наталія СТАНКЕВІЧ. 
Фота для ілюстрацыі.