Авторизация
 

«Міёрыводаканал» - аб тым, як вырашаюцца праблемы ў 2020 годзе

 Філіял «Міёрыводаканал» – гэта калектыў са 104 чалавек, якія абслугоўваюць аб’екты водападвядзення і водаадвядзення ў трох раёнах – Браслаўскім, Міёрскім і Шаркаўшчынскім. Гаспадарка клопатная, бо новая арганізацыя атрымала ў спадчыну старыя сеткі, асабліва на вёсцы. Іх неабходна падтрымліваць у рабочым стане і пашыраць. Галоўнае патрабаванне цяперашняга часу і насельніцтва – павышаць якасць пітной вады, зводзіць да мінімуму забруджванне наваколля сцёкамі. Як вырашаюцца гэтыя праблемы ў 2020 годзе, гутарым з дырэктарам філіяла Юрыем МЯЦЕЛІЦАМ.

 

– Наш філіял – адзін з трох, нядаўна ўтвораных у вобласці на базе невялікіх райцэнтраў. Гэтая абставіна і іншыя цяжкасці сучаснага перыяду стрымліваюць набыццё фінансавай самадастатковасці, да якой настойліва імкнёмся, – падкрэслівае Юрый Уладзіміравіч, – таму паступова развіваемся, вызначыліся з нішай работ і паслуг, шукаем шляхі далейшага павышэння эканамічнай эфектыўнасці. Толькі на Міёршчыне сёлета пабудаваны дзве станцыі абезжалезвання вады: у Канцэраве і Пад’ельцах. У Дзісне вадавод з цэнтра горада падведзены ў пасёлак ЛВДС. Зрабіць гэта было няпроста, бо пераадольвалі раку. Аднак аб’ект у асноўным закончылі 13 лістапада, завяршаем на ім даводку і наладку.

 
Бытавыя сцёкі з гэтага пасёлка па калектары ў 1,7 кіламетра ўжо трапляюць на новыя ачысныя збудаванні, што з’явіліся ля гарадской звалкі. Яны сваю ролю выконваюць добра: аналізы паказалі, што з іх выцякае вада больш чыстая, чым тая, якую нясе рака Дзісна.
Аднак асноўная нагрузка на філіял – гэта абслугоўванне даўно дзеючых водаправодных і каналізацыйных сетак і збудаванняў. Сёлета замянілі 1,8 кіла- метра падводзячых спажыўцам ваду труб, з іх 1 км у Міёрскім раёне.

 
Увогуле спраў эксплуатацыённікам пад кіраўніцтвам намесніка дырэктара па арганізацыйна-тэхнічных пытаннях Юрыя Паплаўскага і будаўнікам з начальнікам аддзела капітальнага будаўніцтва Сяргеем Курузам хапае.

 

 У чым бачыце рэзервы для развіцця?

– Іх не толькі бачым – імкнёмся выкарыстоўваць. Наш філіял аказвае насельніцтву транспартныя паслугі, спецыяльная машына адпампоўвае сцёкі з мясцовай каналізацыі ў прыватным сектары пры аплаце 6 рублёў за кубаметр. Падключаем жыллё да водаправода і каналізацыі, дзе такая магчымасць ёсць. Забяспечваем земляныя, будаўнічыя, праектныя і іншыя работы.

 

Якімі аб’ектамі парадуеце землякоў у 2021-м?

– Цяпер з пэўнымі цяжкасцямі, але няўхільна ідзе праектаванне новых ачысных збудаванняў для райцэнтра. Разлічваю, што за іх узвядзенне возьмемся ў наступным годзе. Станцыя абезжалезвання павінна з’явіцца ў Даўгінаве. Ёсць магчымасць пры фінансавай падтрымцы Еўрапейскага банка рэканструкцыі і развіцця пабудаваць такія ж аб’екты ў аграгарадках Ідолта, Павяцце, Туркова. Запланавана замяніць тры кіламетры водаправодных труб.
Як бачыце, намаганні накіраваны перш за ўсё на павышэнне якасці вады, пастаўляемай спажыўцам, на вырашэнне экалагічных праблем.

 

Што хацелі б атрымліваць ад спажыўцоў у адказ?

– Крыху большай увагі да нашых агульных клопатаў. Напрыклад, неадкладна паведамляць пра праблемы з водаправодам і каналізацыяй па нумары 115 ці дыспетчару па тэлефоне 4 83 01, яго мабільны 245 22 95 (МТС). Вялікай запазычанасці па аплаце паслуг спажыўцы, дзякуй ім, не дапускаюць, але іншы раз такое ўсё ж здараецца. Больш клопатаў дастаўляе неахайнае абыходжанне з каналізацыяй.

 

Маю на ўвазе змыванне ў водаадводзячыя трубы рэшткаў агародніны, анучак, дзіцячых цацак, нават касцей жывёлы, іншага, што паленаваліся аднесці ў смеццевыя кантэйнеры. Пры рамонце кватэр гультаяватыя гаспадары (а як па-іншаму іх назваць?) могуць забіць каналізацыю рэшткамі тынкоўкі і нават бетону. Усё гэта потым даводзіцца выбіраць, выдаляць. Асабліва запомнілася, як нашы рамонтнікі змагаліся з рукавом ад ватоўкі: запіхнуць яго ў трубу цяжка, а потым выявіць і намоклы выцягваць было яшчэ больш складана!
Надзейнасць эксплуатацыі зручнасцей у жыллі – наш агульны клопат.

 

Леанід МАТЭЛЕНАК

Фотаматэрыял Казіміра БЛАЖЭВІЧА.

рейтинг: 
Пакінуць каментар
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 20 января 2021
Василий, Иван, Афанасий

Именины 19 января 2021


Госці краін

free counters
Партнеры сайта