У трэці дзень датэрміновага галасавання ў маршруце карэспандэнтаў значыўся Язненскі выбарчы ўчастак № 19. Ён размясціўся ў будынку сельвыканкама.

Тут прыемнае ажыўленне. Вяскоўцы актыўна выказваюць сваю грамадзянскую пазіцыю, заўважае старшыня выбарчай камісіі Дзіна Кавалёнак. Апоўдні наведваюцца пенсіянеры і сацыяльныя работнікі, тыя, хто звяртаецца да старшыні сельвыканкама. У канцы рабочага ідуць на ўчастак сяльчане працаздольнага ўзросту. За першыя два дні прагаласавала каля 15 % выбаршчыкаў, сярод іх і Дзіна Мікалаеўна:

– Каб наша краіна квітнела і панаваў мір, кожны павінен прагаласаваць. Выбіраю дэпутатаў, якія будуць падтрымліваць стабільнасць у Беларусі, спакой і дабрабыт.

 Запатрабавана надомнае галасаванне. Каля паловы жыхароў участка – пажылыя людзі, для многіх шлях няблізкі. Да іх камісія скіруецца ў нядзелю.

Актыўнічае моладзь. Для дзевятнаццацігадовага зваршчыка КУП «Язна» Дзмітрыя Дэпутатава гэта першая выбарчая кампанія. Крыху хвалюецца. Члены камісіі падказваюць, як зарыентавацца ў бюлетэнях. Заходзіць у кабінку і хутка прастаўляе галачкі. Старшыня камісіі віншуе хлопца і ўручае ў падарунак Канстытуцыю.

У Леаніда Шчарбіцкага, наадварот, на рахунку не адна выбарчая кампанія:

– Законаў прытрымліваюся, галасую заўсёды. Жонцы нясуць бюлетэнь дадому, а я сам прыязджаю. Сорак гадоў адробіў у меліярацыі, цяпер на пенсіі. Што для ўсіх нас важна? Каб быў мір, каб краіну сваю захаваць.

 Для старшыні сельвыканкама Валянціны Фядзьковіч, як і для многіх сяльчан, выбары – гэта свята. Яму папярэднічае вялікая падрыхтоўка. Унёсак старшыні сельвыканкама ў фарміраванне грамадзянскай пазіцыі вяскоўцаў важны. На сваім прыкладзе паказвае, што можна жыць і працаваць на дабрабыт сваёй малой радзімы.

– Месца жыхарства ніяк не ўплывае на якасць жыцця. Кожны жыве так, як хоча. І ў вёсцы можна быць шчаслівым. Працаваць трэба паўсюль, таму важна ўкладваць свае сілы і старанні ў нашу дзяржаву, у сваю малую радзіму, – адзначае Валянціна Мікалаеўна.

Алена Вароніна.
Фотаматэрыял Казіміра Блажэвіча.