Дзеці з прыходу храма іконы Божай Маці "Нечаканая радасць" з Наваполацка  даказалі, што толькі добрыя справы--важнейшы набытак. Таму сведчыла арыгінальная пастаноўка. Чалавеку сталі сябрамі веды, прыгажосць, багацце, сіла, дабрачыннасць, пра якую ён напачатку не вельмі дбаў. Пад старасць занядужыў, пакінулі ўсе спадарожнікі. Дабрачыннасць рада б правесці ў апошні шлях, ды міласэрнасці малавата.

Выхаванцы нядзельнай школы прыходу храма Прападобнай Еўфрасінні Полацкай з вёскі Бароўка Верхнядзвінскага благачыння ў песнях славілі Госпада, Божую Маці і ўсіх мам. За жыццё, што нам падарылі, за выхаванне, клопат… "Мама"—міжволі пад песню выкрыкнуў малы з залы да сваёй мамы. І ўсталявалася ненаўмысная паралель паміж словамі з песні і рэчаіснасцю. 

Удзельнікі прыходу Глыбоцкага сабора Нараджэння Прасвятой Багародзіцы стукаліся да пад-свядомасці аўдыторыі праз інсцэніроўку. Хлопчык сцвярджаў багатаму тату, што не трэба шкадаваць для іншых. Усё аддасца ў сто разоў. Нашу міласціну жабраку Гасподзь прымае як Самому Сабе. На Божай далоні ўсе роўныя, і кожнаму ёсць месца. 

Нядзельная школа прыходу храма святой Вялікапакутніцы Параскевы з вёскі Пліса Глыбоцкага благачыння выступленнем выклікала слёзы нават у самых скупых на чуллівасць. Расказалі пра воіна Яўгена Радзівонава, які прайшоў сваю Галгофу ў 18 год. У Дзень нараджэння хлопца і свята Узнясення Гасподняга чачэнцы адсеклі яму галаву, бо не пагадзіўся зняць з грудзей крыжык. Мама доўга шукала сына, самі ж шакалы і прадалі месца пахавання за 4 тысячы долараў. Жанчына сама раскапала магілу, знайшла там галаву сына, месіва з костак…І крыжык.

Дзеці з прыходу храма Вялікамучаніка Георгія Пабеданосца ў в. Сітцы Докшыцкага благачыння заклікалі захоўваць багацце душы і святло несканчонай любові. Царскія сыны раз'ехаліся па свеце і вярнуліся хваліцца. Адзін пабудаваў шчасце на крыві іншых. Другі скупляе сусвет праз людскія слёзы. Трэці папрасіў прабачэння, што не стаў вялікім, стараўся і працаваў сумленна. Яму і завяшчаў тата царскі трон. 

Нядзельная школа храма Палажэння Рызы Прасвятой Багародзіцы  ва Улахерне з Міёр заклікала, каб наш зямны шлях быў пачаткам вечнасці, служыў ёй праўдай і верай. Шмат званых, ды мала выбраных. Імкнуцца да духоўнай дасканаласці—вышэйшая мэта. У інсцэніроўцы падарожнік доўга шукаў Хрыста, праз свой шлях вучыўся Божым законам. 

Выхаванцы прыходу храма іконы Божай Маці "Усіх смуткуючых Радасць" з Шаркаўшчыны заклікалі грэшнікаў да пакаяння. Ніхто з пасяленцаў гасцініцы не ўпусціў да сябе здарожанага путніка. Ім аказаўся Бог.

Нядзельная школа прыходу Спаса-Праабражэнскай царквы ў аграгарадку Язна чаравала анёлкавым танцам, вучыла пакорлівасці, бо з гэтай якасці пачынаецца кожная Божая запаведзь.

Выступоўцы ўзнагароджаны дыпломамі і граматамі па намінацыях, дзіцячымі рэлігійнымі кнігамі. Вызначаны лепшыя ў выставе тэматычных падзелак. Намаляваныя і змайстраваныя анёлкі, галубы, цэрквы яшчэ раз пацвердзілі прыгажосць свету. "З году ў год удзельнікі падыходзяць больш адказна. "Цудоўна, што славяць Госпада ў песнях, вершах, інсцэніроўках",—гаварыў протаіерэй Віктар Вабішчэвіч, благачынны Міёрскай акругі. "Як хутка ў мора льюцца воды, так бягуць і нашы годы. Духоўныя каштоўнасці і выхаванне—самыя каштоўныя арыенціры, на якіх грунтуецца жыццё",—гаварыла прадстаўнік раённай улады Аксана Ашурка.

Старшыня Язненскага сельвыканкама Валянціна Фядзьковіч—актыўны арганізатар свята. Узрушаная, яна шчыра прызналася, "Благавест" заўсёды радуе святлом, штогод прыносіць аддушыну. Усё ўдаецца, дзякуючы дружнай камандзе. Надзейныя памочнікі—клуб і бібліятэка. Кніжная гаспадыня Ларыса Карпава аформіла выставы, выпусціла ў свет дыпломы і граматы, займалася арганізацыяй. Галоўны ўрач Язненскай бальніцы Уладзімір Пашковіч—гэта падмурак фестывалю і самабытны яго вядучы. Дасведчаны гісторык Ірына Стома—таксама першапраходца і актыўная памагатая. Настаяцель Язненскага храма Сергій Гуцко з "Благавестам" ад самага пачатку. 

Акрамя ноткі духоўнасці, мерапрыемства нясе рэальную дапамогу тым, каму яна неабходна. Летась сабраны сродкі на лячэнне язненкі Анастасіі Морхат-Акружной. Сёлета прадстаўнікі пошука-выратавальнага атрада "Анёл" па блаславенні Уладыкі Феадосія правялі дабрачынную акцыю ў падтрымку хворага глыбачаніна Ігара Грышкевіча. Здаровага хлопца, валейбаліста, танцора, выхаванца глыбоцкай нядзельнай школы бесчалавечна збілі, зрабіўшы інвалідам. Страшна параўноўваць: якім быў і стаў Ігар. Моцна жадае выправіцца, жыць. На лячэнне збіраюцца сродкі.Паважаныя міярчане, не заставайцеся ў баку ад чужой бяды. Зрабіць унёсак можна ў банку, а таксама праз паслугі "Адвольны плацеж (плацеж па рэквізітах)", у інфакіёсках, інтэрнэт-банкінгу і М-банкінгу:

-беларускія  рублі—транзітны рахунак 3819382309284 на дабрачынны рахунак  000018 у цэнтры банкаўскіх паслуг №208 г. Глыбокае, УНП 300230580; МФО 150801648. На імя Грышкевіч Вольгі Вікенцьеўны для лячэння і рэабілітацыі сына Грышкевіча Ігара Генадзьевіча.

"Жыццё на Зямлі як шлях да Вечнасці",—пад такім дэвізам праходзіў сёлетні фестываль. Гучаць званы—зямлі і неба гукавая нітка. Кліча храм—сёмае неба для нас. Мы на Зямлі ў гасцях. І будуць апошнія першымі, а першыя—апошнімі, бо шмат званых, ды мала выбраных. Гасподзь усіх заклікае стаць нашчадкамі Царства Нябеснага, але адзінкі ідуць шляхам ратавання. Толькі дабрыня, дапамога і малітва вечныя.