— У складзе творцаў Віцебскай вобласці, запрошаных на рэспубліканскі фестываль, Міёршчыну прадстаўляла знакамітая сям'я Філіпавых у складзе таты Сяргея і яго дачок—Марыны і Насці. На гэты раз яны ўдзельнічалі ў дывертысменце творчых калектываў "Сугучча". У якасці лаўрэатаў Віцебшчыну прадстаўляла інструментальнае трыа з выкладчыкаў музыкі Верхнядзвінскай і Міёрскай школ мастацтваў. Гэта Аляксей Латышонак (кіраўнік; баян) і нашы землякі Сяргей Матэленак (баян) і Антоній Блажэвіч (бас-гітара),—падкрэсліў намеснік дырэктара цэнтралізаванай клубнай сістэмы Васіль Мядзюха.—Гэты таленавіты калектыў атрымаў высокія адзнакі членаў журы на леташнім абласным фестывалі нацыянальных культур. Сёлета інструментальны гурт выступаў на галоўнай гродзенскай сцэне ў канцэрце "Шчасце разам песні спяваць" з арыгінальным музычным нумарам. Адметна, што трыа было адзіным лаўрэатам ад Віцебшчыны.

Вярнуўшыся дадому, нашы землякі сціпла адзначылі, што былі толькі маленькай часцінкай рэспубліканскага этнафестывалю, які сёлета ўпершыню праходзіў пад патранажам ЮНЕСКА. Хлопцы выказалі падзяку загадчыку аддзела ідэалагічнай работы, культуры і па справах моладзі райвыканкама Аляксандру Тронькіну, дырэктару Міёрскай дзіцячай школы мастацтваў Баляславу Чарняўскаму, намесніку дырэктара ЦБС Васілю Мядзюху за вырашэнне пытанняў па арганізацыі паездкі на фестываль.

Трэба адзначыць, што ў мінулым годзе інструментальнае трыа атрымала перамогу ў Міжнародным творчым інтэрнэт-конкурсе "Gallerytalents ru", дзе кампетэнтнае журы высока ацаніла прафесіяналізм калектываў у выкананні твораў "Озорные наигрыши" і "Ритм века—рок-н-ролл". Спадзяёмся, што і надалей хлопцам паспадарожнічае поспех.