Нямецкіх вытворцаў металаапрацоўчага абсталявання прынялі намеснік старшыні аблвыканкама А.С. Мацкевіч, старшыня Міёрскага райвыканкама І.В. Кузняцоў, у размове прымалі ўдзел адказныя работнікі абласнога і раённага ўзроўняў, прадстаўнікі кіраўніцтва ТАА "ММПЗ-груп". А затым прыезджыя пазнаёміліся з ходам будаўніцтва жылля для будучых спецыялістаў прадпрыемства, пабывалі ў кватэрах дома, які амаль гатовы прыняць жыхароў. Дарэчы, яшчэ тры такія ж васьмікватэрныя дамы ўжо пад дахам, закладваецца фундамент пятага з васьмі запраектаваных. Для работнікаў завода будзе ўзводзіцца і пяціпавярховы дом.

Цікавасць нямецкіх спецыялістаў выклікала непасрэдна будаўнічая пляцоўка будучага прадпрыемства. Аўтамабільная дарога да яе падведзена, зараз дарожнікі адсыпаюць пад'езд уздоўж асноўнага цэха. Вялікія аб'ёмы работ выкананы на водазаборы, высакавольтавай электралініі і газаправодзе, з дня на дзень пачнецца адсыпка пад'язных ветак чыгункі. Тлумачэнні па гэтых і іншых пытаннях нямецкім спецыялістам даваў член савета дырэктароў ТАА "ММПЗ-груп" А.А. Кавалёнак.