Авторизация
 

Міёрскае аддзяленне дзённага знаходжання для інвалідаў ТЦСАН пераехала на новае месца

  Светла, прасторна, для ўсіх задумак і ідэй ёсць месца. Пра гэта супрацоўнікі і наведвальнікі аддзялення дзённага знаходжання для інвалідаў ТЦСАН марылі даўно. Жаданні споўніліся сёлета ў верасні, калі з будынка тэрытарыяльнага цэнтра пераехалі на новае месца. Наваселле справілі ў былым дзіцячым аддзяленні райбальніцы. Напярэдадні Міжнароднага дня інвалідаў рэдакцыя пабывала тут у гасцях.

 

гадчыца аддзялення Таццяна Шульга сустракае на ганку. Заўважаем, што пра зручнасць і камфорт тут паклапаціліся з парога. Для інвалідаў-калясачнікаў зрабілі шырокі пакаты пандус, па якім зручна падымацца ў будынак і спускацца на дарогу.

 
– У сярэдзіне верасня ў нас пабываў намеснік міністра працы і сацыяльнай абароны Аляксей Румак. Адзначыў, што створанае безбар’ернае асяроддзе адно з найлепшых у вобласці, – расказвае Таццяна Паўлаўна. – Цяпер аддзяленне займае 176 метраў квадратных. У дзесяці кабінетах размясціліся творчыя майстэрні, пакой для рэлаксацыі, спартзала, сацыяльная кухня, гасцёўня, санвузел. Перамяшчацца зручна ўсім наведвальнікам.

 

 Сацыялізацыя праз творчасць, спорт, быт

Кожны куточак напоўнены атмасферай творчасці і ўтульнасцю.
Майстэрню «Лаўка цудаў», дзе ўмелыя рукі інструктара па працоўнай тэрапіі і кіраўніка гуртка Алены Плехтан і яе падапечных ствараюць арыгінальныя керамічныя вырабы, упрыгожвае вялікі насценны малюнак міёрскай набярэжнай і касцёла.
– Для нас гэта як наглядны дапаможнік. На аловачніцах, талерках, каляндарах і іншых дэкаратыўных вырабах часта адлюстроўваем адметнасці Міёршчыны, у тым ліку касцёл, – гаворыць Алена Анатольеўна.

 
Гэта яна аўтар прывабнага насценнага малюнка. Выявамі цікавых мясцін Міёрскага краю аздобіла сцены ў іншых памяшканнях. Так, у майстэрні «Займальная працатворчасць», дзе гаспадарыць яе калега Карына Арлюкевіч, любуемся малюнкам святой крыніцы ў вёсцы Дзедзіна. Затым пераводзім позірк на прыгожыя вырабы ручной работы.

 
– Працуем з льновалакном, прыродным матэрыялам, рознымі падручнымі сродкамі. Апошнім часам захапіліся вязаннем сумак з каляровых поліэфірных шнуроў. Самі прыдумваем мадэлі і фасоны. Атрымліваюцца стыльныя і практычныя аксэсуары, – гаворыць Карына Паўлаўна. – Яшчэ шыем зручныя маскі. Цяпер яны асабліва запатрабаваны.

 
 Разам з творчымі справамі наведвальнікаў аддзялення вучаць наладжваць быт і планаваць бюджэт. Практычныя навыкі атрымліваюць на занятках гуртка «Акадэмія дамаводства», якім кіруе Вікторыя Ракіцкая. Практыкуюцца ў рамонце адзення, у майстраванні патрэбных у быце рэчаў з падручных матэрыялаў, у кулінарыі. Самым смачным днём называюць у аддзяленні чацвер, калі заняткі праходзяць у сацыяльнай кухні. Тут ёсць электрычная пліта, мульціварка, кававарка, посуд і ўсё неабходнае для кулінарных клопатаў. З простых і даступных прадуктаў атрымліваюцца смачныя стравы. Напрыклад, пастаянны наведвальнік аддзялення Максім Жугар так захапіўся выпечкай пірагоў, што цяпер да дня нараджэння сваіх сяброў гатуе ім духмяныя ласункі.

 
– Сёння ў нас аладкі з яблыкамі, – гаворыць валанцёр аддзялення Анастасія Кулянок, энергічна націраючы на тарцы спелыя плады.
Аматараў актыўнага ладу жыцця чакае спартзала з трэнажорамі і розным інвентаром. Пасля творчых, спартыўных і бытавых заняткаў можна прыемна правесці час у пакоі рэлаксацыі. Сядзець на мяккай канапе з кубачкам чаю, удыхаць прыемны водар, якім напаўняе пакой спецыяльная лямпа, любавацца малюнкам вадаспаду на сцяне, займацца пескатэрапіяй. У гэтым пакоі праводзіць групавыя і індывідуальныя заняткі псіхолаг цэнтра Зінаіда Равецкая.

 
– Нашы падапечныя самі праявілі ініцыятыву займацца з псіхолагам. Ім хочацца шчырых зносін, – заўважае загадчыца аддзялення Таццяна Шульга. – Наша мэта – максімальна сацыялізаваць сваіх падапечных, інтэграваць іх у грамадства, навучыць жыць самастойна і не адчуваць сябе недасканалымі.

 

Валанцёры побач

Рады ў аддзяленні валанцёрскай дапамозе.
– Калектыў наш невялікі: усяго пяць чалавек. Цудоўна, што ёсць пастаянныя памочнікі, многія з якіх таксама маюць групу інваліднасці, – расказвае Таццяна Паўлаўна. – Згодна з заканадаўствам, аддзяленне працуе толькі з інвалідамі першай і другой груп. У каго трэцяя, можа быць валанцёрам.

 
 За энергічнасць і крэатыў цэняць Валянціну Юшкевіч – старшыню раённай арганізацыі Беларускага таварыства інвалідаў і кіраўніка клуба «Надзея». Заўсёды рады Марыі Грыгаровіч і яе парадам па здаровым ладзе жыцця, масажы, гімнастыцы, рэцэптам карысных страў.
Актывістка на раённых і абласных конкурсах – Анастасія Кулянок. Яшчэ яна кіруе брыгадай узаема-
дапамогі «Талака». Гэтую суполку валанцёры і наведвальнікі аддзялення стварылі самі, дапамагаюць з бытавымі клопатамі таварышам.
«Хуткая дапамога» ў справе добраўпарадкавання – сямейная пара Генадзя і Наталлі Дубікаў. Перад наваселлем штодня прыходзілі і працавалі на тэрыторыі.

 
Духоўным настаўнікам можна назваць Таццяну Пацеенак, кіраўніка клуба «Азбука праваслаўя». На пасяджэннях расказвае пра мясцовую царкву і іконы, што ў ёй знаходзяцца, пра свята праваслаўнага календара, пра супрацьстаянне спакусам, праводзіць майстар-класы па прыгатаванні посных страў. Менавіта па ініцыятыве Таццяны Міхайлаўны штогод 3 снежня ў міёрскай царкве адбываецца малебен пра здароўе хворых. На ім пастаянна прысутнічаюць супрацоўнікі і падапечныя аддзялення дзённага знаходжання інвалідаў.
– Мы вельмі ўдзячны ўсім валанцёрам за іх шчырае жаданне дапамагаць і быць побач. Падтрымка і дабрыня важныя для кожнага чалавека. Людзі з абмежаванымі магчымасцямі маюць у іх яшчэ большую патрэбу, – заўважае Таццяна Шульга.

 

Супрацоўнікі і наведвальнікі аддзялення дзённага знаходжання для інвалідаў выказваюць шчырую ўдзячнасць кіраўніцтву раёна за фінансаванне і дапамогу ў правядзенні рамонту ў іх новым месцы жыхарства.

 
За матэрыяльную падтрымку ўдзячны ўдзельнікам дабрачыннай акцыі па ўладкаванні новага «Дома дабра». У іх ліку раённы выканаўчы камітэт, аддзел ідэалагічнай работы, культуры і па справах моладзі, аддзел па адукацыі, СШ № 2, СШ № 3 імя Я. Томкі, Дзісненская і Язненская СШ, Чапукоўская, Новапагосцкая, Павяцкая ЯС-СШ, Дворнасельская, Сіцькоўская, Завуццеўская, Туркоўская, Узмёнская ЯС-БШ, Слабадская ЯС-ПШ, яслі-сады № 2 і № 3, Дзісненскі, Язненскі, Чэраскі яслі-сады, цэнтр карэкцыйна-развівальнага навучання і рэабілітацыі, Міёрскі раён электрасетак, прадстаўніцтва Белдзяржстраху па Міёрскім раёне, Новапагосцкі сельвыканкам, раённы аддзел унутраных спраў, цэнтр па забеспячэнні дзейнасці бюджэтных арганізацый, УП «Пінскдрэў-Віцебск», ДРБУ-203, УП «Гандлёвы дом «Лагуна», ІП А. Рачыцкая.

 

Кацярына РЫНКЕВІЧ

Фотарэпартаж Казіміра БЛАЖЭВІЧА.

рейтинг: 
Пакінуць каментар
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 18 мая 2021
Адриан, Ирина, Яков

Именины 17 мая 2021
Иван, Исаакий, Кирилл, Климент, Леонтий, Никита, Николай, Мария, Пелагея

Госці краін

free counters
Партнеры сайта