Дык вось, Франц Іванавіч выдаў накладам у 300 асобнікаў у мінскім выдавецтве "Логвінаў" чарговую, дзясятую па ліку кнігу пад назвай "Плебейскія гульні". У ёй тры аповесці— "Цымант", "Дзве вясны дзяцей Прыяпа" і непасрэдна "Плебейскія гульні". Вялікія аматары сучаснай беларускай літаратуры ўжо маглі атрымаць пэўнае ўяўленне пра іх змест, бо некаторыя поўнасцю або часткова друкаваліся ў часопісе "Дзеяслоў" і штомесячніку "Літаратурная Беларусь".

Аўтар інтрыгуе жыхароў Міёршчыны тым, што асобныя сюжэты аповесцяў з новай кнігі навеяны ўспамінамі з малой радзімы. Не лішнім будзе дадаць, што раней Франц Іванавіч заявіў пра сябе як выдатны спецыяліст крымінальнай інтрыгі (перачытайце пры магчымасці яго "Апошняе падарожжа ў краіну ліваў").  Вось і зноў абяцае элементы дэтэктыву.

Гэтая кніжка—вынік працы апошняга дзесяцігоддзя,—адзначае аўтар.