Авторизация
 

Наша зямлячка Наталля Бучынская піша казкі

 Нарадзілася 24 лютага 1970 года ў вёсцы Ідолта ў сям’і настаўнікаў. У 1985-м скончыла Мілашоўскую васьмігодку, а ў 1987-м – Міёрскую СШ № 2. Потым у 1993-м адолела філалагічны факультэт БДУ, аддзяленне беларускай і рускай мовы і літаратуры. Рэалістка з аптымістычным ухілам, магчыма, аптымістка з рэалістычным светаўспрыняццем у залежнасці ад карэктыў жыцця. Жыве і працуе ў Мінску.

Першая казка пабачыла свет у раённай газеце «Сцяг працы» ў 1986-м. Гучалі казкі ў радыёперадачы «Рамантыкі», друкаваліся ў дзіцячых часопісах «Вясёлка» і «Островок», «Городской газете», зборніках серыі «Беларуская аўтарская казка»: «Чароўныя пацеркі», «Вежа міру», «Залаты талер» (выдавецтва «Мастацкая літаратура»), у зборніку «Блакітная кніга ў творах беларускіх пісьменнікаў» (выдавецтва «Літаратура і Мастацтва»), у зборніках серыі «Школьная Бібліятэка» – у «Зборніку апавяданняў для пазакласнага чытання вучняў пачатковай школы» і «Пакліч у госці сонца». У серыі «Казкі ХХІ стагоддзя» ў 2008-м выйшла кніга «Прыгоды маленькай Машынкі», у 2012-м – аўтарскі пераклад на рускую мову, у 2013-м (выдавецтва «Мастацкая літаратура») – казачная аповесць «Незабыўныя сустрэчы з авечкай Адэляй, або adeljastar@tut.by», у 2015-м – «Атракцыёны для Вадзянікоў» – былі і небыліцы пра жыццё надводнае і падводнае. У 2016-м яна намінавана на прэмію Цёткі, увайшла ў шорт-ліст.


У 2016 – 2017-м актыўна ўдзельнічала ў рэспубліканскім сацыяльным праекце «Чытаем па-беларуску з Velcom».
Казкі і апавяданні друкуюцца ў часопісе «Верасень», «Бярозка», «Вясёлка», «Буся», «Качели», гучаць на радыёканале «Культура» ў перадачы «ДНК» (Дасціпныя. Нястомныя. Кемлівыя.).


Асобныя казкі ўключаны ў склад зборнікаў «З днём народзінаў, альбо Свята, якое ёсць у кожнага», «Беларуская зіма», «Беларуская вясна», «Беларускае лета» (выдавецтва «Мастацкая літаратура»).
У 2019-м у выдавецтве «Беларусь» пабачыла свет кніга «Прынцэса Алівія і «жабіны вочкі».
Актыўна падтрымлівае сацыяльны праект «Беларусь: профессионалы – детям в трудной жизненной ситуации».

Прапануем вашай увазе адну з казак Наталлі Бучынскай.

Лепісін і Быляк. Вітамінныя чалавечкі

Знаёмцеся! Гэтых малюпусікаў завуць Лепісін і Быляк. Лепісін жыве сярод апельсінаў. А Быляк – сярод яблыкаў. Яны сябруюць. Кожны заняты справай – сочыць, каб дзеці елі дастаткова яблыкаў і апельсінаў. У іх шмат вітамінаў! Калі дзеці ўжываюць мала вітамінаў, Быляк і Лепісін ходзяць сумныя і панурыя. І склікаюць адзін другога на нараду.

Быляк уладкаваўся нанач ля вялікага яблыка. Вочы зліпаліся, пазяхалася штохвіліны, а заснуць не мог. Данімала нейкае бубненне над вухам. Час быў позні. Быляк вызірнуў са схованкі. На кухні нікога, а тэлевізар працуе. Чалавечак хацеў выключыць надакучлівую скрыню. Але ішла перадача пра яго любімыя яблыкі! Быляк натапырыў вушы.


– Многія краіны пачалі апрацоўваць яблыкі хімікатамі, – расказвала вядоўца. – Гэта спрыяе іх добраму захоўванню праз зіму. Яблыкі выглядаюць прыгожымі і апетытнымі! Але тыя, хто іх есць, пачынаюць пакутаваць на алергію! Асабліва дзеці!
Быляк захваляваўся! Ён ведаў, што такое алергія! На шчочках высыпаюць чырвоныя балячкі, яны чэшуцца, дзеці капрызяць. А калі дзеці капрызяць, яны не хочуць гуляць, не хочуць бегаць і скакаць. І растуць марудна!


Як так? А ён збіраўся раніцай падсунуць смачны яблык хлопчыку, што жыў з бацькамі ў гэтай кватэры! Славік любіць яблыкі, яго і ўгаворваць не трэба. З’есць кашу, пасля яблыкам падмацуецца! А Быляк з замілаваннем паглядае на гэта і цешыцца.
Па тэлевізары далей расказвалі пра шкодныя і не шкодныя спосабы захавання яблыкаў. (*Не ўсе яблыкі апрацоўваюць, не пужайцеся! Тыя, што выраслі ў садах вашых бабуль і дзядуль, хутчэй за ўсё нічым не апрацаваныя! Толькі і іх трэба мыць!) Але Быляк ад узрушэння больш нічога не чуў. Ён падхапіў заплечнік і кінуўся да Лепісіна – за парадай.


– Тук-тук! – пагрукаў Быляк у дзверы.
– Што грукочаш? – усклікнуў Лепісін, адчыняючы. – Ажно вушы залажыла!
– Не да тваіх вушэй, дружа! Тут такое робіцца!


Быляк хуценька пераказаў навіну. І дадаў:
– Нават чарвячкі ды мошкі такія яблыкі не чапаюць. Баяцца алергіі. І як цяпер дзяцей яблыкамі карміць? Як ім у вочы глядзець? – ледзь не плакаў Быляк.
– А калі мыць яблыкі перад ежай? – спытаў Лепісін.
– Мыць – абавязкова! Але ці дапаможа?


Апельсінавы чалавечак адсунуў талерку з амаль аблупленым ад скуркі апельсінам, зняў з гачка халат. Усе важныя пытанні Лепісін і Быляк вырашалі, апрануўшы белыя халаты. Так ім лепш думалася.
Быляк таксама ўбраўся ў халат і паклаў на стол прыгожы яблык, набыты ў краме. Малюпусікі дасталі скрыначкі з міні-лабараторыямі і пачаліся доследы над яблыкам. У кожнага меўся вітамінавымяральнік. Ён паказваў і карысць, і шкоду, якую можа прынесці садавіна.


Мылі яблык з мылам. Церлі шчоткай. Прасвечвалі яго кварцавай лямпай. Пасыпалі содай. Мазалі зялёнкай. Мучыліся самі і мучылі яблык. А хімічная апрацоўка ніяк не паддавалася. І раптам Лепісіну прышла ў галаву геніяльная думка! Ён падсунуў пад вітамінавымяральнік напалову абабраны апельсін.


Прыбор паказаў цікавы вынік: скурка апельсіна пульсавала небяспечным для садавіны сінім святлом. Значыць, апельсін быў таксама апрацаваны хімікатамі. Затое абабраныя долькі свяціліся карысным жоўтым святлом!
Лепісін паскроб у патыліцы.


– Відаць, апельсіны таксама апрацоўваюць хімікатамі. Але абабраны апельсін ужо не шкодны!
– Ну-тка, праверым! – зацікавіўся Быляк, схапіўшы невялічкі ножык, абрэзаў з яблыка скурку. Знятая скурка пад вітамінавымяральнікам таксама свяцілася сінім. А абабраны яблык – жоўтым!


Лепісін і Быляк паціснулі адзін аднаму рукі. Яны далі рады праблеме! Засталося толькі прывучыць усіх дзяцей, іх мам і тат, бабуль і дзядуль абіраць скурку з яблыкаў.
Раскажы пра гэта сваім сябрам. Так ты дапаможаш Быляку і Лепісіну і ўратуеш некага ад алергіі!

Фота з архіва рэдакцыі.

рейтинг: 
Пакінуць каментар
иконка
Посетители, находящиеся в группе Гости, не могут оставлять комментарии к данной публикации.
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 8 августа 2022
Игнатий, Моисей, Сергей, Федор, Прасковья

Именины 7 августа 2022
Александр, Макар, Николай, Анна, Ираида

Госці краін

free counters
Партнеры сайта