В Миорской детской библиотеке состоялась встреча с писательницей и журналисткой Еленой БАСИКИРСКОЙ

 З чаго пачаць верш і што натхняе на творчасць? Пра гэта пыталіся пяцікласнікі з СШ № 3 імя Я. Томкі ў нашай зямлячкі, пісьменніцы, журналісткі Алены БАСІКІРСКАЙ. Сустрэча з ёй адбылася ў Міёрскай дзіцячай бібліятэцы пад дэвізам «Жыць з дабрынёй і верыць у святло».

 

– Выступаць перад землякамі заўсёды хвалююча, нават калі аўдыторыя – маленькія дзеці, – заўважыла госця.
У родных Міёрах Алена Басікірская бывае нячаста. Жыве і працуе ў Мінску ў выдавецкім доме «Беларусь Сегодня», дзе друкуецца «Сельская газета», для якой піша артыкулы. Падчас водпуску прыехала дадому і з задавальненнем завітала на сустрэчу са школьнікамі. Прыхапіла свае кнігі і раздрукоўкі нядаўна напісаных вершаў. Заўважыла, што паэты рэдка ведаюць на памяць уласныя творы, таму, чытаючы іх, звяртаюцца да «шпаргалак».

 
Тэматыка вершаў у Алены разнастайная. Чытала дзецям радкі пра родную мову і свой край, пра каштоўнасць кожнага дня і ўменне цаніць тое, што маем. Знайшла адлюстраванне ў творчасці прафесійная дзейнасць. Адзін з інфармацыйных накірункаў, у якім працуе, – медыцынская тэматыка. Рыхтуе для газеты матэрыялы пра ўрачоў, адданых сваёй справе, пра  барацьбу з пандэміяй каронавіруса. Гэта натхніла і на вершаваныя радкі.

 
Хвалюе пісьменніцу лёс беларускай мовы. На гэтую тэму нядаўна размаўляла са старшакласнікамі адной з мінскіх школ. Нягледзячы на беларускамоўныя друкаваныя выданні і тэлеканалы, у паўсядзённым ужытку родная мова мала распаўсюджана. Алена Басікірская пераканана, што любоў да свайго слова трэба прывіваць дзецям са школы, выкарыстоўваючы эфектыўныя метады.

 
Юным слухачам госця раіла спрабаваць сябе ў паэтычнай творчасці, выказваць на паперы свае думкі і перажыванні. Прачытала свае вершаваныя радкі вучаніца 5 «Б» класа Валерыя Паўлоўская. Дзяўчынка захапляецца літаратурай, робіць першыя крокі ў паэзіі.

 
Амаль гадзіну доўжыўся змястоўны дыялог пісьменніцы і дзяцей. На кожнае пытанне цікаўныя слухачы атрымлівалі простыя і грунтоўныя адказы. Пасля да Алены выстраілася чарга за аўтографамі і фота на памяць. 

 

Кацярына РЫНКЕВІЧ

Фотаматэрыял аўтара.

0 комментариев

Добавить комментарий

Информация
Комментировать статьи на сайте возможно только в течении 360 дней со дня публикации.