Авторизация
 

Міёрскай дзіцячай школе мастацтваў 50!

 Стварыць і падарыць свята — гэта майстэрства. У Міёрскай дзіцячай школе мастацтваў ім валодаюць дасканала. Багатая фотагалерэя, бліскучая лічба 50 на майках юных танцораў, сувеніры для гасцей, цёплыя віншаванні, запамінальныя нумары — усё гэта складнікі юбілейнай урачыстасці, якая адбылася 4 лістапада ў раённым Доме культуры.

 Светлая настальгія

Займаць месцы ў глядзельнай зале госці не спяшаліся. У фае вабілі фотагалерэя і выстава творчых работ. На чорна-белых і каляровых здымках многія знаходзілі сябе. "Пазнаеш тут сваю маці?" — пытаецца ў дачушкі выпускніца 1999 года Марына Драба.


— Мы з Мінска. У Міёры прыязджаем да бацькоў. У школе мастацтваў займалася на харэаграфічным аддзяленні. Вучылася ў Святланы Зянонаўны Касцюкевіч, Наталлі Генадзьеўны Варанько. Выкладаю харэаграфію ў мінскай школе,—расказвае Марына.—Прыемна, што запрасілі на свята. Рада сустрэчы з настаўнікамі і дзяцінствам.


Юныя артысты ў яркіх касцюмах і з лічбамі 5 і 0 рыхтуюцца да выступлення. За імі назірае малады спецыяліст Юлія Лабуць.
— Падабаецца працаваць у гэтай школе. Дружны калектыў, дзеці мяне любяць, — гаворыць Юлія. — Школу мастацтваў скончыла ў роднай Шаркаўшчыне. Пасля віцебскага вучылішча размеркавалі ў Міёры.
Выхаванцы тэатральна-харэаграфічнага аддзялення змянілі на сцэне ўзорны аркестр баянаў і акардэонаў, які распачаў святочны канцэрт.

 Пра мінулы дзень

Сучасная школа мастацтваў — гэта 34 выкладчыкі, 410 вучняў, навучанне па чатырох напрамках, дзевяць самадзейных калектываў. Пачыналася ўсё з драўлянага будынка з пячным ацяпленнем, чацвярых педагогаў і 56 выхаванцаў. Мінулае школы, імёны выкладчыкаў, этапы станаўлення прыгадалі ў гістарычным экскурсе вядучыя Аляксей Гайдзель і Наталля Варанько. Падкрэслілі, што фундамент установы — педагагічны калектыў. Падмурак трывалы. Дзясяткі год прысвяцілі дзецям і творчасці Мікалай Рагоўскі, Надзея Абалевіч,Тамара і Ігар Валчкі, Зінаіда Пучкоўская, Лідзія Алеська. Адны на заслужаным адпачынку, іншыя па-ранейшаму спяшаюцца на заняткі. 

— У школы мастацтваў зайздроснае мінулае, добры сённяшні дзень і бліскучая будучыня, — падвялі вынік вядучыя.

 Віншаванні, падарункі, узнагароды

Цёплыя словы педагогам, вучням, выпускнікам адрасавалі паважаныя госці свята. У прывітальным лісце ад старшыні райвыканкама Ігара Кузняцова падкрэслівалася, што школа мастацтваў— нязменны спадарожнік важных падзей у раёне. Школай, якая дорыць толькі пазітыў, назвала ўстанову намеснік старшыні райвыканкама Таццяна Стальмачонак. Пра ўменне скарыць дзяцей абаяльнасцю і раскрыць іх таленты гаварыла старшыня раённага Савета дэпутатаў Марыя Баніфатава. Начальнік аддзела ідэалагічнай работы, культуры і па справах моладзі Аляксандр Тронькін заўважыў, што ў школы ёсць усе ўмовы для творчасці, поспехаў і перамог.


З добрымі словамі і прыемнымі сюрпрызамі завіталі на свята дырэктар СШ №2 Уладзімір Ханецкі, намеснік дырэктара СШ №3 Вольга Федуковіч, калектыў УП ЖКГ "Азярніцы", калегі з Браслава і Шаркаўшчыны.


Для школы мастацтваў — каштоўныя падарункі. Для выкладчыкаў — заслужаныя ўзнагароды. Ганаровай граматай раённага Савета дэпутатаў адзначана творчая дзейнасць кіраўніка народнага аддзялення Ігара Лаўца. Ганаровую грамату райвыканкама ўручылі загадчыцы выяўленчага аддзялення Наталлі Даргель. Узнагароду ад аддзела ідэалагічнай работы, культуры і па справах моладзі атрымала выкладчык фартэпіяна-скрыпічнага аддзялення Ірына Болтач.


Віншаванняў і цёплых слоў прагучала шмат. З відэаэкрана звяртаўся да былых калег адзін з колішніх дырэктараў школы Мікалай Рыгоравіч Далгалёў. Час, праведзены ў атмасферы творчасці, назваў лепшым перыядам у сваім жыцці, а музыку — лякарствам ад усіх хвароб. Яго сын — кампазітар Дзмітрый Далгалёў — віншаваў школу з юбілеем са сцэны РДК.
Відэавіншаванне і прызнанне школе ў любові з ЗША даслаў Сяргей Аляксееў. З японскай сталіцы Токіа вітала калег Святлана Касцюкевіч.

 На сцэне выпускнікі

Прыемны падарунак для педагогаў — поспехі колішніх выхаванцаў. Як адзначыў дырэктар установы Баляслаў Чарняўскі, з 1100 выпускнікоў 20% звязалі сваю прафесію з творчасцю. У святочны канцэрт уключылі нумары былых вучняў.


— Я пайшоў па жыцці правільнай сцежкай. Люблю сваю работу, — гаварыў выпускнік 1978 года Сяргей Воранаў, выкладчык філіяла Полацкай дзіцячай школы мастацтваў.


Педагог Наваполацкага музычнага каледжа Аляксандр Шабуцкі школу мастацтваў у Міёрах скончыў у 1996 годзе.


Не мог не завітаць на свята Сяргей Філіпаў. Са школы пуцёўку ў творчасць атрымалі ўсе трое дзяцей таленавітай сям'і. Марына спявае ў джазавым калектыве. Арсеній заканчвае акадэмію музыкі імя Гнесіных у Маскве. Лаўрэат шматлікіх конкурсаў Анастасія прыехала з музычным падарункам.


Па-дамашняму ўтульным можна назваць творчы нумар ад сям'і Капцюг, таксама былых навучэнцаў.


***
Выступленні выпускнікоў пацвердзілі словы пра зайздроснае мінулае. У паспяховым сённяшнім дні ўпэўнілі нумары Дашы Каральковай і Сашы Мацвеевай, ансамбля "Гармонія" дзісенскага філіяла, народнага ансамбля песні "Мёрыца", дзіцячага хору і іншых таленавітых і яркіх вучняў і педагогаў.
У бліскучым будучым няма сумненняў.

Больш фота гл. у групах у сацыяльных сетках.

Фота Казіміра БЛАЖЭВІЧА.

Кацярына РЫНКЕВІЧ.

рейтинг: 
Пакінуць каментар
иконка
Каментаваць артыкулы на нашым сайце магчыма толькі ў плыні 360 дзён з дня публікацыі.
Мы ў сацыяльных сетках
  • Камэнтуюць
  • Актуальна
  • Чытанае

Рэцыдыў

  • 09 ноябрь 2010, 11:17
  • 93 274
  • 0

Інвестыцыйны форум

  • 23 сентябрь 2011, 10:05
  • 68 204
  • 1

Пераброддзе 2012. Погляд вучонага

  • 31 август 2012, 15:19
  • 34 495
  • 0

  • 11 февраль 2011, 11:20
  • 33 240
  • 0

Кандыдатамі жадаюць стаць

  • 21 август 2012, 15:30
  • 32 267
  • 0

Злавілі рыбку, ды… залатую

  • 28 февраль 2011, 16:16
  • 30 323
  • 0

Вагон "вярнуўся"

  • 11 июнь 2013, 10:04
  • 0
  • 2

Пра тых, хто акты рэгіструе

  • 19 декабрь 2012, 09:24
  • 0
  • 2

Трагічны люты

  • 01 март 2011, 09:00
  • 21 284
  • 2
Курс валют НБРБ
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 16 ноября 2018
Александр, Богдан, Василий, Викентий, Владимир, Иван, Илья, Иосиф, Кузьма, Николай, Павел, Петр, Сергей, Федор, Федот, Анна, Евдокия, Семен

Именины 15 ноября 2018
Константин

Госці краін
free counters
Партнеры сайта