На Міёршчыне спаборніцтва на сяўбе стартавала

Эліза БЛАЖЭВІЧ Са слоў старшыні райкама прафсаюза работнікаў АПК Леанід ХАХЕЛЬ, 27 сакавіка прэзідыум раённага камітэта беларускага прафесійнага саюза работнікаў аграпрамысловага комплексу прыняў пастанову "Аб задачах прафсаюзных арганізацый па ўдзеле ў падрыхтоўцы і правядзенні вясенне-палявых работ". Яе выкананне накіравана на тое, каб кожны работнік дасягнуў  больш высокай вытворчасці працы, паскорыў тэмпы сяўбы і яе якасць.

Прафкамы сельгасарганізацый на пашыраных пасяджэннях разгледзяць увесь комплекс пытанняў, звязаных з удзелам прафарганізацый у вясенне-палявой кампаніі. Сумесна з эканамічнай службай райсельгасхарчу і спецыялістамі неабходна распрацаваць умовы аплаты працы, прэміравання, дадатковых мер маральнага і матэрыяльнага стымулявання работнікаў, занятых на вясенне-палявых работах. З гэтай нагоды неабходна арганізаваць працоўнае спаборніцтва, з яго ўмовамі азнаёміць удзельнікаў, пры гэтым асаблівую ўвагу звярнуць на захаванне працоўнай дысцыпліны. Вынікі работы на сяўбе павінны падводзіцца штодзённа. У гонар перадавікоў рэкамендавана ўздымаць сцяг і ўручаць непасрэдна на працоўных месцах граматы, падзякі і грашовыя прэміі.

Звесткі пра лепшых работнікаў размесцяцца на стэндах прафсаюзных арганізацый. Важна не дапусціць вытворчага траўматызму і прычынення шкоды здароўю работнікаў, а таму старшыні прафкамітэтаў "пярвічак" сумесна з інспектарамі па ахове працы трымаюць на строгім кантролі правядзенне своечасовых інструктажоў па тэхніцы бяспекі. Работнікі павінны быць забяспечаны спецвопраткай, медаптэчкамі, сродкамі індывідуальнай аховы, гарачым харчаваннем.