Галоўная > Грамадства / Рэлігія > Смачна, сытна, разнастайна: экскурсія па сталовай ММПЗ

Смачна, сытна, разнастайна: экскурсія па сталовай ММПЗ


14-06-2021, 13:22. размясціў: gazeta

 Міёрскаму заводу па вытворчасці металічнага ліста і белай бляхі няма аналагаў на ўсёй постсавецкай прасторы. Каля 30 яго будынкаў размясціліся на 42 гектарах зямлі. Заварожваюць сваёй магутнасцю цэхі, найсучасная вытворчасць. Уражваюць і перавагі для завадчан. На прадпрыемстве дзейнічае сталовая, яе супрацоўнікі стараюцца ўсіх смачна накарміць. Пасля напружанай змены металургам прыемна вяртацца ў новае ўтульнае жыллё. На ўскрайку райцэнтра пабудаваны цэлы мікрараён таунхаўсаў і 40-кватэрная пяціпавярхоўка па вуліцы Лермантава.

 

Супрацоўнікам металапракатнага завода няма неабходнасці браць на работу зсабойкі. Паабедаць можна ў завадской сталовай. Штодня наведвальнікаў чакае смачны асартымент абедзенных страў. Ёсць у меню прапановы і для прыхільнікаў правільнага харчавання, і для тых, хто любіць паласавацца духмянай выпечкай, якую гатуюць у кандытарскім цэху.

 

Абедаў хопіць усім

З 11.00 сталовая гатова прымаць наведвальнікаў. Найбольш ажыўлена тут бліжэй да апоўдня. Прыходзяць падсілкавацца спецыялісты,  работнікі цэхаў. Абедзенная зала адначасова можа змясціць да 100 чалавек. За дзень у сярэднім харчуюцца 150. Доўгія чэргі на раздачы не ўзнікаюць: для зручнасці на заводзе загадзя распрацавалі графік наведвання сталовай па цэхах. Да 14.00 усе жадаючыя паспяваюць паабедаць.

 
– Харчуюся тут штодня. Гатуюць добра. Меню змяняецца, стравы розныя, таму любімых у мяне яшчэ не з’явілася, – расказвае начальнік цэнтральнай завадской лабараторыі Аляксей Радзівонаў. – Раней працаваў на Беларускім металургічным заводзе ў Жлобіне. Там таксама абедаў у сталовай, але выбар быў большы. Можа быць, з часам і тут асартымент пашырыцца.

 
– Абедаць прыходжу не кожны раз. Стравы розныя выбіраю. Прапаноў хапае, і ўсё смачна, – гаворыць менеджар па закупках Вольга Куруза.

 
 У дзень візіту рэдакцыі ў сталовай прапаноўвалі на абед суп капусны і бульбяны з фасоляй, прасяную кашу і бульбяное пюрэ, капусту брокалі на пары, смажаную ў яйку і сыры рыбу, свіную пячонку з цыбуляй, сасіскі, салаты з гародніны, розныя напоі і выпечку з уласнага цэху. Ёсць з чаго выбіраць.

 
Азнаёміўшыся з меню і цэнамі, наведвальнікі ставяць на падносы стравы, што больш прывабілі, і накіроўваюцца да касіра. Разлічвацца можна наяўнымі, карткай або праз прапускны чып. У апошнім выпадку суму вылічуць з зарплаты. Кошт абеду залежыць ад выбраных страў. Комплексны набор з супа, салаты, мясной ці рыбнай стравы і напою абыходзіццца ў восем – дзесяць рублёў. Калі дастаткова, напрыклад, катлеты з салатай, можна ўкласціся ў тры – чатыры.

 

Працуе зладжаная каманда

У штаце завадской сталовай 14 чалавек. Загадчык, бухгалтар, таваразнаўца, касіры, повары, кухонныя работнікі, прыбіральшчык, грузчык. Ва ўсіх свае абавязкі, але гатовы дапамагаць адзін аднаму.

 
– Сваю работу зрабіла – да іншых на падмогу спяшаюся. Калі трэба, і падлогу памыю, і сталы ў парадак прывяду. Узаемавыручка згуртоўвае калектыў, – заўважае старшы повар Ларыса Жылевіч. – Працую тут з першых дзён. Раней была занята ў санаторыі «Расінка». Маю шосты разрад і больш за 25 гадоў стажу. У завадской сталовай працаваць падабаецца. Змена доўжыцца з васьмі раніцы да васьмі вечара, але я прывыкла да нагрузак і хуткага тэмпу. Да таго ж зручны графік: тры дні працуем, тры адпачываем.

 
 З «Расінкі» перайшла ў сталовую металапракатнага завода і повар Вольга Кузьміна. Гаворыць, развітвацца з санаторыем, на кухні якога прайшло 26 гадоў, было няпроста. Аднак новую старонку ў сваім жыцці адгарнула з цікавасцю. Касір Алена Дармаковіч раней працавала кладаўшчыком у ДРБУ-203. Работа з лічбамі і дакументацыяй ёй добра знаёма. Хутка асвоілася на новым месцы. Перш чым сесці за касавы апарат, дапамагае калегам падрыхтаваць абедзенную залу. На любым аб’екце грамадскага харчавання разам з чысцінёй і тэмпам важны добры настрой. Гэта таксама адзін са складнікаў смачнай стравы і прыемнага апетыту. Персанал працуе на пазітыве.

 

На стадыі развіцця з задачамі на перспектыву

Першых наведвальнікаў сталовая ММПЗ прыняла 20 студзеня. Чатыры месяцы работы загадчык вытворчасці Яўген Сухадолец называе стадыяй развіцця і лічыць, што на гэтым этапе спрацавалі паспяхова. У сталовай сучаснае абсталяванне, адказная каманда, расце колькасць наведвальнікаў.

 
– У асноўным харчуюцца супрацоўнікі завода. Кармілі работнікаў іншых арганізацый, якія былі заняты на нашым прадпрыемстве, – расказвае загадчык вытворчасці. – Дарэчы, меню складаем на аснове праграмы харчавання, распрацаванай сумесна са спецыялістамі навукова-практычнага цэнтра па харчаванні Нацыянальнай Акадэміі навук. Уключаем стравы для дыетычнага і лячэбна-прафілактычнага харчавання. Напрыклад, катлеты на пары, запяканкі і так далей. У рамках праграмы вытворчага кантролю заключылі дагавор з раённым цэнтрам гігіены і эпідэміялогіі, супрацоўнікі якога раз на месяц праводзяць кантрольныя мерапрыемствы. Выконваем санітарна-гігіенічныя нормы. Чысціня і  парадак на кухні – закон.

 
Сфера грамадскага харчавання Яўгену добра знаёма. У 2015 годзе скончыў Магілёўскі дзяржуніверсітэт, дзе атрымаў спецыяльнасці інжынера-тэхнолага грамадскага харчавання і эканаміста камерцыйнай дзейнасці тавараў народнага спажывання. Працаваў у санаторыях, з мінулага года заняты на металапракатным заводзе ў Міёрах.

 
Як расказаў загадчык вытворчасці, прадукцыю для завадской сталовай у асноўным пастаўляюць прадпрыемствы Віцебскай вобласці. Сярод іх міёрскія мясакамбінат і ўчастак хлебазавода, Верхнядзвінскі масласырзавод. Вывучаецца пытанне па супрацоўніцтве з мясцовымі сялянскімі (фермерскімі) гаспадаркамі, у якіх завод зацікаўлены закупляць садавіну і гародніну.

 
Імкнуцца арганізаваць харчаванне для работнікаў начных змен. Закуплены апарат самаабслугоўвання, дзе можа будзе выбраць гатовую страву. Застанецца толькі разагрэць у мікрахвалёўцы. Намераны развіваць рознічны гандаль. Для гэтага трэба вывучыць спажывецкі попыт. Да прыкладу, марожанае, якое нядаўна з’явілася ў буфеце, разыходзіцца хутка. Задумак яшчэ шмат, а галоўная мэта – задаволіць сваіх кліентаў.

 

Кацярына РЫНКЕВІЧ

Фотарэпартаж Казіміра БЛАЖЭВІЧА.


Вярнуцца назад