Встреча миорчан по случаю Дня пожилых людей припоздала

gazeta 10-10-2016, 15:43 0 Грамадства

Склалася так, што ўрачыстасць з нагоды Дня пажылых людзей па прычыне іншых планавых мерапрыемстваў адзначалася ў райцэнтры пазней каляндарнай даты, 3-га кастрычніка. Кіраўнік ветэранскай арганізацыі Часлаў Кашкур і яго памочніца Зоя Родзіна падрыхтавалі для актыву цікавую праграму. Напачатку прайшла экскурсія па экалагічнай сцежцы на балота Ельня.

Аказалася, што многія адолелі тыя паўтара кіламетра над дрыгвой упершыню. З цікавасцю слухалі аповед спецыяліста рэспубліканскага ландшафтнага заказніка Алёны Бандарук пра мясцовыя расліны і жыўнасць, унікальнасць і аднаўленне аднаго з самых вялікіх верхавых балот не толькі краіны. А першы восеньскі туман толькі надаваў таямнічасці падарожжу.

У зале тэрытарыяльнага цэнтра сацыяльнага абслугоўвання насельніцтва музычнымі нумарамі віталі ўдзельнікаў урачыстасці выхаванцы дзіцячай школы мастацтваў пад кіраўніцтвам Ігара Лаўца. Мелодыі баяна выкладчыка падхапілі ці дапоўнілі юныя баяніст Багдан Варонька, гітарыст Кірыл Дзехцяронак, балалаечнік Артур Гусейнаў і на барабаннай устаноўцы—Дзмітрый Максіменка.

Тон "Святу мудрасці", узвышаны і крыху настальгічны, задала дэкламацыяй верша Зоя Родзіна. Кожны ўдзельнік атрымаў яркі кляновы лісток са светлым пажаданнем. Яе пачын перахапілі вядучыя Таццяна Шульга і Вольга Пацяёнак.

Старшыня раёнага Савета Марыя Баніфатава, вітаючы ветэранскі актыў, гаварыла пра асаблівасці маленькага гарадка, дзе ўсе ўсіх ведаюць. Пажадала часцей сустракацца на розных мерапрыемствах, падтрымліваць аптымізм добрымі словамі, дзяліцца вопытам і жыццёвай мудрасцю.

Часлаў Кашкур прадставіў новых кіраўнікоў пярвічных арганізацый. Гэта Раіса Парфёненка, Міхаіл Шымуковіч, Вольга Кукуць, Пётр Самчанка. Падставай выказаць ім добрыя пажаданні сталі актыўнасць усіх, а таксама нядаўнія 70-годдзе Міхаіла Іванавіча і дзень нараджэння Вольгі Пятроўны.

Душэўнае багацце ветэранаў, іх гатоўнасць падтрымаць, падзяліцца вопытам адзначыла намеснік начальніка аддзела ідэалагічнай работы, культуры і па справах моладзі Аксана Ашурка. Што ветэраны працы прыходзяць на змену ветэранам вайны, падкрэсліла кіраўнік раённага фонду міру Ала Смерцьева. Цяпер ім трэба больш актыўна ўплываць на ўвекавечанне баявой і працоўнай славы нашага народа і краіны. Чалавек не павінен адчуваць адзіноту—лічыць старшыня клуба "Бажэна" Ірына Гушча. Яшчэ ён павінен мець мэту ў жыцці, -- дапоўніў настаўнік і краязнаўца Вітольд Ермалёнак. Дарэчы, сам ён цяпер жадае асвоіць кавальскую справу. Дзякавалі за цікавую сустрэчу Мікалай Каранкевіч, Вячаслаў Стома і іншыя ўдзельнікі.

А што больш за ўсё аб'ядноўвае людзей пажылога ўзросту? Вядома, гэта агульныя памкненні, успаміны і песні юнацтва. Вось яны асабліва дружна гучалі пад акардэон Сцяпана Забэлы.