Гасцей вітала кіраўнік клуба Ірына Гушча. Адзначыла, што настаўнік заўсёды жыве ў думках і ўчынках людзей. Прыгадала педагогаў раёна, якіх сёлета не стала. Светлую памяць пра іх ушанавалі хвілінай маўчання.

З прывітальнымі словамі звярталася да прысутных намеснік начальніка аддзела адукацыі, спорту і турызму Галіна Гур'ева. Радасць свята падзяліла старшыня райкама прафсаюза работнікаў адукацыі і навукі Алена Фёдарава. Незвычайны фармат сустрэчы і цёплая атмасфера спрыялі змястоўнаму і цікаваму адпачынку.

Павітаўшы адзін аднаго салютам з праколатых паветраных шароў, удзельнікі пазнаёміліся бліжэй. Кожны расказваў пра сябе, сваю прафесію і любімыя заняткі. Педагагічныя стажы ветэранаў уражваюць—36, 45 і больш год. 

Павіншаваць педагогаў і парадаваць "бажэнаўцаў" завіталі выкладчык дзіцячай школы мастацтваў Ігар Лавец і яго выхаванцы. Музычныя творы ў іх выкананні слухалі з замілаваннем і ўзнагароджвалі шчодрымі апладысментамі.

Бытавыя і працоўныя ўмовы настаўнікаў-ветэранаў значна адрозніваліся ад сучасных. Аднак цвёрдай хадой спяшаліся яны на ўрокі нават у пару заслужанага адпачынку і цяпер здзіўляюць аптымізмам і жыццялюбствам. З задавальненнем спявалі песні, танцавалі кракавяк, разыгрывалі прызы і стваралі ружы з кляновага лісця. 

Далучыліся да віншаванняў імяніннікаў "Бажэны". Пажаданні і падарункі клуб падрыхтаваў для Марыі Іванаўны Шчаснай і Алы Пятроўны Смерцьевай. 

Развітваліся сябры са спадзяваннямі на новыя сустрэчы.