Авторизация
 

Папярэдзіць, каб засцерагчы

1
Наркотыкі – гэта страшна. Лепш не мець да іх ніякага дачынення. Такі вывад зрабілі дзевяцікласнікі СШ № 2 пасля сустрэчы ў ТЦСАН 1 сакавіка – у Міжнародны дзень барацьбы з наркаманіяй і незаконным абаротам наркотыкаў. З дзецьмі правялі час папярэджання «Наркотыкі: рэальнасць ці свет ілюзій».

Згодна са статыстыкай, 275 мільёнаў чалавек у свеце ўжываюць наркотыкі. Бясшкодных доз не існуе, і з першага разу можа ўзнікнуць залежнасць, пазбавіцца ад якой без дапамогі спецыялістаў немагчыма. У стане ломкі нарказалежны гатовы нават на злачынства, каб толькі задаволіць нездаровую патрэбу. Наркотыкі атручваюць арганізм, а працягласць жыцця наркамана – не больш за дзесяць гадоў. Такія факты прывяла псіхолаг ТЦСАН Зінаіда Равецкая. Разам з аўдыторыяй паразважалі наконт прычын, па якіх падлеткі спрабуюць наркотыкі. Сярод іх цікаўнасць, імкненне не быць белай варонай у кампаніі, жаданне зняць стрэс ці бар’ер у зносінах. Расплата за непрацяглыя імгненні эйфарыі – парушаная псіхіка, букет хвароб, сапсаваныя адносіны з блізкімі і сябрамі. Міфы пра тое, што наркотыкі з’яўляюцца пропускам у асаблівы свет, у стане эйфарыі раскрываюцца творчыя здольнасці, а адмовіцца можна ў любы момант, заўсёды разбіваюцца аб суровую рэальнасць, калі аказваешся на сацыяльным дне з туманнай перспектывай вяртання да звычайнага жыцця.

Наркотыкі цягнуць за сабой праблемы з законам. Прычым узнікаюць яны не толькі ў тых, хто іх ужывае. Як расказала старшы інспектар інспекцыі па справах непаўналетніх РАУС Святлана Хаданёнак, з пачатку года ў краіне затрымалі 125 падлеткаў, якія распаўсюджвалі і захоўвалі наркотыкі. Рабіць закладкі – хуткі і немалы заробак для моладзі. Як правіла, 30 долараў за адну паслугу. Аднак аматары лёгкіх грошай разлічваюцца гадамі свайго жыцця. Інспектар ІСН заўважыла, што з гэтага года знізілі з 16 да 14 гадоў узрост крымінальнай адказнасці за злачынствы, звязаныя з незаконным абаротам наркатычных рэчываў, і ўзмацнілі меры пакарання за іх. Цяпер максімальны тэрмін пазбаўлення волі – 25 гадоў. Да прыкладу, самае строгае пакаранне  за забойства – 12 гадоў. Наркотыкі яшчэ большае зло. Яны забіваюць не аднаго, а мільёны чалавек. На пяць гадоў могуць пазбавіць волі за прадастаўленне памяшкання для захавання наркотыкаў, нават калі сам гаспадар іх не ўжывае і не распаўсюджвае. 

Для нашага раёна праблема наркаманіі актуальная ў меншай ступені, чым для буйных гарадоў. Між тым, як заўважыла Святлана Хаданёнак, у мінулым годзе ўзбуджана адна крымінальная справа па факце захавання наркотыкаў. У стане наркатычнага ап’янення затрымалі вадзіцеля адной з арганізацый. Як вынік – штраф і пазбаўленне права садзіцца за руль на пяць гадоў.
Раіла інспектар быць асцярожнымі з таблеткамі. Вядомы выпадкі, калі падлеткі такім чынам імкнуліся спазнаваць новыя адчуванні. Папярэдзіла пра адміністрацыйную адказнасць за курэнне ў грамадскім месцы – штраф у чатыры базавыя велічыні. Папулярныя ў падлеткавым асяродку электронныя цыгарэты не выключэнне. 

Прыклады з жыцця, калі ўжыванне наркотыкаў мела негатыўныя і трагічныя наступствы, прывяла старшыня раённай арганізацыі Беларускага Таварыства Чырвонага Крыжа Ганна Ліскова. На свае вочы бачыла, як студэнт-першакурснік ляжаў на абочыне дарогі і нібы плыў у пыле. З вну хлопца выключылі. Яшчэ адзін 
студэнт паспрабаваў наркотык і «выйшаў» у акно. Займаць свой вольны час цікавымі справамі раіла дзевяцікласнікам першы сакратар райкама БРСМ Анжэла Маляўка. 

На развітанне ўдзельнікі сустрэчы атрымалі сувеніры ад райкама БРСМ і раённай арганізацыі «Белая Русь», якія таксама стануць напамінам пра тое, што жыццё – самая галоўная каштоўнасць і не варта ламаць яго імкненнем да лёгкіх грошай ці неверагодных адчуванняў. 

Кацярына РЫНКЕВІЧ
Фота Казіміра БЛАЖЭВІЧА
рейтинг: 
Пакінуць каментар
иконка
Посетители, находящиеся в группе Гости, не могут оставлять комментарии к данной публикации.
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 21 мая 2022
Адриан, Арсений, Иван

Именины 20 мая 2022
Антон, Давид, Иван, Иосиф, Михаил, Степан, Фаддей, Семен

Госці краін

free counters
Партнеры сайта