Авторизация
 

Таццяна Гілеп з Дзісны:«Тут мой куточак, маё шчасце, маё ўсё»

 У кожнага ёсць сваё месца сілы. Дзе душа знаходзіць радасць і спакой, дзе насычаемся энергіяй і ўпэўненасцю, адчуваем сябе шчаслівымі. Для Таццяны ГІЛЕП стала такім месцам Дзісна. Утульны маленькі гарадок называе найлепшым месцам у свеце.

 

– Тут цішыня і спакой, добрыя і ўважлівыя людзі, – гаворыць Таццяна Антонаўна. – У любую пару года наш гарадок утульны і прывабны. Зімой іду прагуляцца ў лясок, летнім вечарам люблю на мосце слухаць шэпт ракі і песню салаўя.

 
У Дзісне Таццяну Гілеп ведае кожны. Больш за дваццаць гадоў яна ўзначальвае мясцовае аддзяленне сувязі. Інжынер – гідратэхнік па спецыяльнасці знайшла сябе ў паштовай сферы. Лічыць, што гэта невыпадкова. Доўгі час працавала паштальёнам яе маці Вера Нічыпараўна. Сама пачынала аператарам. Знаёмілася з паштовай справай непасрэдна на рабочым месцы. І цяпер удзячна сваім настаўнікам у прафесіі – былому начальніку раённага вузла паштовай сувязі Лідзіі Пальчэх і яе намесніку Галіне Курыльчык.

 
– Штораніцы іду на працу з радасцю і ў добрым настроі, – кажа яна. – Кожны дзень напоўнены зносінамі. Гэта прыносіць задавальненне. Вядома, як і на любой рабоце, бываюць складаныя сітуацыі, здараюцца дробныя непрыемнасці. Аднак я не акцэнтую на гэтым увагу. Кіруюся парадай: зрабіце глыбокія ўдых і выдых, усміхніцеся і працуйце далей.

 
Акрамя паштовых паслуг Таццяна Антонаўна дапамагае гараджанам вырашаць іншыя пытанні. Некалькі скліканняў яна ў складзе гарадскога Савета дэпутатаў, год таму стала старэйшынай вуліцы Леніна. Гаворыць, грамадскія клопаты не ў цяжар. Асноўная сфера дзейнасці і так звязана са зносінамі з людзьмі, а гэта дадатковая магчымасць быць карыснай для сваіх землякоў.

 
– Звяртаюцца гараджане з пытаннямі наконт вывазу смецця, абкосу тэрыторыі, спілавання старых дрэў і іншымі. Дробныя праблемы стараемся вырашаць адразу, каб яны не сталі глабальнымі, – заўважае суразмоўніца. – Люблю слухаць людзей, дапамагаць ім. Мне гэта ў радасць. Часам дастаткова даць слушную параду, падтрымаць добрым словам. Бывае, чалавек настроены негатыўна, нават з агрэсіяй. Пагутарыш з ім, прапануеш паглядзець на праблему з іншага боку, і ўсё аказваецца не так складана, як адразу здавалася.

 
Псіхалогіяй Таццяна Антонаўна не захапляецца. Уменне слухаць, шукаць падыход да чалавека, дзяліцца пазітывам у яе ад прыроды. Як і аптымістычае светаўспрыманне з правілам ніколі не падаць духам і не апускаць рук. Са школы знаёма грамадская дзейнасць. Была старастай у класе, спраўлялася з такімі ж абавязкамі ў інстытуце. Кола зносін заўсёды мела шырокае.

 
Старанні і грамадскую пазіцыю Таццяны Гілеп адзначаюць не толькі ў родным горадзе. Сёлета яе партрэт занесены на раённую Дошку гонару. Дарэчы, не ўпершыню.
– Для мяне гэта было нечаканым і прыемным сюрпрызам, – усміхаецца яна. – Радасна, што цэняць і заўважаюць.

 
Прычын для радасці ў Таццяны шмат. Жыве ў родным горадзе, з якім адчувае трывалую душэўную повязь. Занята справай, якая прыносіць задавальненне і патрэбна людзям. Чакае ў госці з Мінска дарагіх дзяцей – дачку Анастасію і зяця Вячаслава з любімымі ўнукамі – 12-гадовым Пашам і 4-гадовай Соняй. Ім таксама падабаецца Дзісна за яе размераны рытм жыцця, маляўнічыя краявіды і ўтульную цішыню. Усе разам прыходзяць на свята горада.

 
– Цудоўна, што ў Дзісны з’явілася сваё свята. Калі раней збіраліся толькі на Адзігітрыю, то цяпер ёсць яшчэ адна нагода, – радуецца Таццяна Антонаўна. – А я люблю свой горад і ў святы, і ў будні. Для мяне гэта самы лепшы куточак.

 

Кацярына РЫНКЕВІЧ

Фота Казіміра БЛАЖЭВІЧА.

рейтинг: 
Пакінуць каментар
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 24 июля 2021
Аркадий, Лев, Елена, Ольга

Именины 23 июля 2021
Александр, Антон, Георгий, Даниил, Леонтий, Петр

Госці краін

free counters
Партнеры сайта