"Міёрскі край для вас загадка? Тады, будзь ласка, да нас, братка», сцвярджае першы нумар Міёрскай даўніны. Дакладней, аўтар гэтых радкоў Вікторыя КОНАХ. На яго старонках знойдзеце матэрыялы, якія ўвойдуць у «Стратэгію ўстойлівага развіцця раёна» і шмат іншай цікавай інфармацыі.
Напрыклад, будзе створаны маладзёжны рэсурсны цэнтр даследавання гісторыка-культурнай спадчыны рэгіёна. Фундаментам для яго стане паспяховая дзейнасць музейнага аб’яднання школы і гуртка «Арганаўты мінулага». Папярэдняе анкетаванне паказала, што большасць жыхароў і гасцей раёна з задавальненнем будуць вывучаць гісторыю нашага краю.
Нумар змяшчае каляндар юбілейных дат 2021 года, водгук на кнігу Марыі Ермалёнак «Бусинки судеб на лент времени», са зместам якой газета ўжо знаёміла чытачоў, а таксама анонс кнігі Томаша Гжываеўскага «Сцёртая мяжа. Слядамі Рэчы Паспалітай», у якую ўвайшлі і аповеды нашых землякоў. Выданне, толькі пабачыўшы свет, стала бэстсэлерам і трапіла ў рэйтынг самых папулярных выданняў у Польшчы.
Працягваюцца праекты «Славутасці Пагосцкага краю» і «Мартыралог Дзісеншчыны». Астатняе даведаецеся з першакрыніцы.