Авторизация
 

Супрацоўнікі загса адзначылі прафесійнае свята

 Галоўныя жыццёвыя дарогі кожнага чалавека ідуць праз органы загса. Нас прыводзяць сюды радасныя і сумныя нагоды. Стварэнне сям’і, нараджэнне дзяцей, страта блізкіх – усё знаходзіць адлюстраванне ў актах грамадзянскага стану. 18 снежня справаводы нашых лёсаў адзначылі прафесійнае свята. 

 

І мінчане ў Міёрах шлюб бяруць

Працоўны тыдзень у начальніка аддзела загса райвыканкама Ірыны Юхно і галоўнага спецыяліста Таццяны Зарудніцкай пачынаецца ў аўторак. Як правіла, гэта самы багаты на візіты грамадзян дзень.
– Зарэгістравалі нараджэнне дваіх дзяцей. Прыемна, – радуецца Таццяна Рыгораўна.

 
– Адна пара прыйшла падаваць заяву на рэгістрацыю шлюбу. Ствараюць сям’ю беларус і расіянка, – дадае Ірына Сяргееўна. – З пачатку года зарэгістравалі пяць шлюбаў з іншаземцамі. Сярод іх двое грамадзян Украіны, па адным – Расійскай Федэрацыі, Казахстана, Арменіі.
Як заўважаюць работнікі загса, сёлета шлюбаў менш. За 11 месяцаў стварылі сем’і 66 пар, у мінулым годзе – 86. Верагодна, унесла свае карэктывы эпідсітуацыя. Дзень нараджэння сям’і хочацца адзначаць у шырокім коле родных і сяброў, а ў перыяд пандэміі гэта недапушчальна. Магчыма, хтосьці верыць у прыкметы і вырашыў перачакаць высакосны год.

 
Трэба заўважыць, у аддзеле загса рэгіструюць шлюбы не толькі міярчане і жыхары раёна. Летам абмяняліся пярсцёнкамі маладыя людзі з Мінска.
– З Міёрамі іх нічога не звязвае. Спадабаліся нашы прыгожыя мясціны, вырашылі тут зладзіць урачыстасць. Да таго ж не трэба займаць чаргу, у адрозненне ад сталічных загсаў, – расказвае галоўны спецыяліст.
– Зарэгістраваць шлюб у нашай краіне можна ў любым аддзеле загса, незалежна ад месца рэгістрацыі і пражывання маладых. Такая магчымасць прадастаўлена заканадаўствам з ліпеня 2012 года, – тлумачыць начальнік аддзела.

 

Даведкі і запыты – складнік штодзённых клопатаў

Значную частку часу работнікі аддзела загса прысвячаюць даведкам, за якімі звяртаюцца грамадзяне. Адным трэба дакументальна пацвердзіць сваяцтва, другім факт знаходжання ў шлюбе ў пэўны перыяд часу.
– Часцей за ўсё звяртаюцца за даведкамі жанчыны, якія скасавалі шлюб. Па тых ці іншых прычынах ім важна засведчыць факт змены прозвішча, – расказвае Ірына Юхно.

 
Яшчэ адзін блок клопатаў – адказы на запыты, дасланыя з іншых устаноў.
Застаецца актуальным унясенне змяненняў у запісы актаў грамадзянскага стану. Выправіць імя ці прозвішча, што калісьці запісалі з памылкай, – працэс складаны.
– Для мяне самая прыемная справа – рэгістрацыя нараджэнняў і шлюбаў, – заўважае Таццяна Зарудніцкая.
– Мне цікава весці справы па змене прозвішчаў, імя ці імя па бацьку, – гаворыць Ірына Юхно.
Нават імя па бацьку можна памяняць

 

Як расказала начальнік аддзела загса, сёлета паступіла дзевяць зваротаў па змене ўласнага імя: сем грамадзян пажадалі змяніць прозвішча, двое – імя па бацьку.
– Імя па бацьку мянялі дзве маладыя дзяўчыны. Абодвух выхоўвалі айчымы, таму вырашылі засведчыць гэта і дакументальна. Галоўнае ўпраўленне юстыцыі іх просьбы задаволіла, – расказвае Ірына Сяргееўна. – Вяртаюць свае дзявочыя прозвішчы жанчыны, якія скасавалі шлюб. Дарэчы, нават знаходзячыся ў шлюбе, можна ўзяць дзявочае прозвішча сваёй маці. Адзін падобны зварот быў ад мужчыны.

 

Толькі спакой і ўважлівасць

Работа з людзьмі і дакументамі. Так можна коратка ахарактарызаваць дзейнасць супрацоўнікаў органаў загса.
– Важнымі прафесійнымі навыкамі лічу ўменне аб’ектыўна ацэньваць сітуацыю, захоўваць спакой і ўважлівасць, – адзначае Ірына Юхно. – Вядома, трэба быць дасведчаным у сваёй справе.

 
Па словах работнікаў аддзела, адзін запіс акта патрабуе мінімум 30 – 40 хвілін. Гэта не заўсёды разумеюць наведвальнікі. На думку некаторых, выдаць пасведчанне, напрыклад, аб нараджэнні – пяціхвілінная справа. У складанні дакументаў, што суправаджаюць па жыцці кожнага чалавека, спешка не да месца.

 

Згодна з заканадаўствам, мінімальны тэрмін з моманту падачы заявы на рэгістрацыю шлюбу да самой урачыстасці – тры дні. Раней гэты перыяд складаў 15 дзён. Зарэгістраваць шлюб у дзень падачы заявы магчыма пры наяўнасці ўважлівых прычын (агульнае дзіця, цяжарнасць нявесты).

 

Кацярына РЫНКЕВІЧ

Фота Казіміра БЛАЖЭВІЧА. 

рейтинг: 
Пакінуць каментар
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 21 января 2021
Василий, Виктор, Владимир, Георгий, Григорий, Дмитрий, Евгений, Емельян, Иван, Илья, Михаил, Юлиан, Василиса, Доминика

Именины 20 января 2021
Василий, Иван, Афанасий

Госці краін

free counters
Партнеры сайта