Авторизация
 

Дасягненні ў спорце і турызму за пяцігодку прааналізавалі на пасяджэнні Міёрскага райвыканкама

 2020-ы – фінальны год выканання раённых мерапрыемстваў па рэалізацыі Дзяржаўных праграм у сферы фізічнай культуры, спорту і турызму. Зробленае за пяцігодку прааналізавалі на пасяджэнні райвыканкама ў мінулую пятніцу.

 

З трэнажорамі і лыжамі
Справаздачны перыяд бярэ адлік з 2016 года. Па інфармацыі загадчыка сектара спорту і турызму райвыканкама Ларысы Малецкай, тады на тэрыторыі спарткомплексу ў Міёрах абсталявалі дзве дадатковыя пляцоўкі для пляжнага валейбола. Сіламі жыллёва-камунальнай гаспадаркі быў мадэрнізаваны комплекс у двары па вуліцы Дзяржынскага, 25. Дарэчы, і па Камуністычнай, 33, 58 парадавалі дзяцей і падлеткаў спартыўна-гульнёвыя пляцоўкі з гімнастычнымі гарадкамі і пясчанымі футбольна-валейбольнымі палямі.

 
У 2017-ым годзе на гарадскім стадыёне з’явілася спартыўная пляцоўка з вулічнымі трэнажорамі. Пазней аналагічную ўстанавілі ў Дзісне. Адрамантавалі першы паверх фізкультурна-аздараўленчага комплексу ў райцэнтры. Сёлета ў жніўні завяршылі работы на другім. Дзякуючы праекту міжнароднай тэхнічнай дапамогі «Разам да грамады і прыроды: Міёрскі раён» на тэрыторыі Язненскай школы цяпер ёсць пляцоўка, вулічныя трэнажоры і варкаўт. З часам аналагічная з’явіцца ва Узмёнах.

 
Усяго ў раёне 111 спартыўных збудаванняў. Дзейнічаюць два пункты праката сезоннага спартыўнага і турыстычнага інвентару ў райцэнты і Дзісне. На Міёршчыне 55 штатных профільных работнікаў, у тым ліку 15 спецыялістаў фізкультурна-спартыўнага комплексу «Міёры», 12 трэнераў-выкладчыкаў дзіцяча-юнацкай спартыўнай школы, 20 настаўнікаў фізічнай культуры і здароўя, два педагогі дадатковай адукацыі ў раённым Цэнтры дзяцей і моладзі, чатыры кіраўнікі фізічнага выхавання гарадскіх садкоў.

 
На ўмацаванне матэрыяльна-тэхнічнай базы ўстаноў адукацыі напярэдадні новага навучальнага года затрацілі 35 623,75 рублёў, у тым ліку 16,2 тысячы – на набыццё спартыўнага інвентару і абсталявання. Сёлета адрамантавалі спартзалы ў Дзісненскай школе, яшчэ раней – у Міёрскай СШ № 2, СШ № 3 імя Я. Томкі і Туркоўскай. Зімовы сезон вучні раёна сустракаюць з лыжамі, абы толькі выпаў снег. У цэлым установы адукацыі забяспечаны спартыўным інвентаром на 87,4 %.

 

І працаваць, і спаборнічаць не лянуюцца
Зацікаўлены ў фізічнай актыўнасці і дарослыя. У 13 установах адукацыі, 14 сельгаспрадпрыемствах, 20 арганізацыях дзейнічаюць клубы па фізкультуры і спорце. Займаюцца ў ФСК «Міёры» і Дзісне, у школах. Ёсць прыстасаваныя памяшканні ў аддзеле па надзвычайных сітуацыях, аддзяленні Дэпартамента аховы МУС РБ, філіяле ДЭУ-34. Праводзяць заняткі інструктары – метадысты па фізкультуры на базе Узмёнскай, Туркоўскай, Язненскай школ.

 
Штогод ладзяцца спартакіяды сярод працоўных калектываў па 11 відах спорту. Летась у іх прынялі ўдзел 12 арганізацый і ўстаноў, восем сельгаспрадпрыемстваў. Найлепшыя вынікі паказалі газавікі, аддзел па адукацыі, аддзяленне Дэпартамента аховы, ААТ «Туркова», «Узмёнскі край», ВУПКУ «Міёрскі». Сёлета ў сувязі з пандэміяй каманд-удзельніц менш.

 

Для фізічнай загартоўк і грошай не шкада
На базе Міёрскага фізкультурна-аздараўленчага комплексу ў 24-х групах па валейболе, футболе, боксе, АФП, аэробіцы, пілатэсе, атлетычнай гімнастыцы, зумбе, аквааэробіцы, плаванні цяпер займаюцца 307 чалавек, з якіх 108 дзяцей. У тым ліку арганізаваны групы на базе аграгарадкоў Туркова, Узмёны, Язна, чатыры – у Дзісне. Спартыўным адпачынкам заняты 10 падлеткаў, якія знаходзяцца на розных відах уліку, 27 дзяцей са шматдзетных, малазабяспечаных сем’яў. Дзве аздараўленчыя групы прызначаны для асоб з абмежаванымі магчымасцямі.
ФСК «Міёры» папаўняецца неабходным інвентаром і абсталяваннем.

 

У 2018 годзе 18 311,07 бюджэтных і пазабюджэтных рублёў накіраваны на пашырэнне спартыўнага асартыменту трэнажорнай залы, турыстычнага фонду. Летась для паляпшэння якасці заняткаў у аздараўленчых групах, папаўнення арсеналу зімовых відаў спорту патрацілі 4 613 рублёў. Сёлета дзякуючы падтрымцы раённага Савета дэпутатаў, райвыканкама з раённага бюджэту дадаткова выдаткавалі 10 399,66 рублёў на інвентар і абсталяванне для новых більярднага і фітнес-залаў, а таксама 19 607,34 рублёў на мэблю для ўводу ў эксплуатацыю ўсяго будынка фізкультурна-аздараўленчага комплексу.

 
У цэлым на будаўніча-ўзнаўленчыя работы тут патрацілі 308 698,05 рублёў. 10 тысяч былі выдаткаваны на набыццё сілавых трэнажораў для трэнажорнай залы пасля візіту міністра спорту і турызму Сяргея Кавальчука. Дапамагалі матэрыяльна «Беларуская федэрацыя боксу», раённае аб’яднанне прафсаюзаў, РК ГА «БРСМ», раённая арганізацыя «Белая Русь».

 

Малайцы ўсе, але баксёры руляць
Наладжана міжраённае ўзаемадзеянне з установамі фізічнай культуры і спорту Верхнядзвінскага, Шаркаўшчынскага, Браслаўскага, Глыбоцкага, Пастаўскага, Шумілінскага раёнаў, Полацка, Наваполацка, Новалукомля, Віцебска. Праводзяцца сумесныя турніры па футболе, валейболе, боксе. Каманда валейбалістак другі год запар займае першае месца на абласных спаборніцтвах у аграгарадку Ноўка. Футбалісты ФК «Міёры» пастаянныя ўдзельнікі чэмпіянату вобласці. У сёлетнім сезоне наша маладзёжная каманда на пятым месцы з 12-і.

 
Выдатныя дасягненні ў юных баксёраў, якія ўваходзяць у тройку лідараў па выніках выступленняў у абласных і занальных спаборніцтвах. У 2018 годзе заваявалі 16 першых, пяць другіх і сем трэціх месц, у 2019-ым – сем першых, шэсць другіх, восем трэціх. Сёлета – тры першыя, тры – другія, адно трэцяе месца. Два найлепшыя баксёры працягваюць навучанне ў Віцебскім дзяржаўным вучылішчы алімпійскага рэзерву, адзін – у Магілёўскім.

 
Спартыўныя здольнасці дзяцей і падлеткаў па валейболе, футболе, лёгкай атлетыцы развіваюць у дзіцяча-юнацкай спартыўнай школе. Цяпер у трох аддзяленнях 21 група, дзе 275 наведвальнікаў. Сёлета яны занялі восем першых месц на абласных спаборніцтвах, тры – другія і пяць трэціх.

 
Пры падтрымцы райвыканкама стала добрай традыцыяй ладзіць свята для адораных і таленавітых дзяцей «Зорны россып», на якім узнагароджваюцца грашовымі прэміямі найлепшыя юныя спартсмены раёна і іх выкладчыкі-трэнеры. У 2016 годзе адзначаны 67 дзяцей, у 2017 – 36, у 2018 – 37, летась 32.

Зроблена шмат, планаў яшчэ больш
У рамках праекта міжнароднай тэхнічнай дапамогі «Разам да грамады і прыроды: Міёрскі раён» плануецца замяніць падлогу ў спартыўнай зале міёрскага спарткомплексу, устанавіць павеці над трыбунамі, з укрыццем на полі для міні-футбола і пляцоўках для пляжнага валейбола на гарадскім стадыёне. Па праектах гуманітарнага супрацоўніцтва «Спартыўная сям’я – здаровая нацыя» і «За здароўем – на спартыўную пляцоўку», якія распрацаваў сектар па спорце і турызме, намечана пабудаваць сучасныя комплексы пад адкрытым небам для сямейнага адпачынку ў мікрараёне Русачкі і ў Дзісне.

 
Разам з тым акрэслена задача павышаць якасць работы па далучэнні насельніцтва да заняткаў фізкультурай і спортам, павялічыць склад наведвальнікаў у спартыўных секцыях, аздараўленчых групах па месцы жыхарства. У кагорце выкладчыкаў не хапае трэнераў, таму важная задача – падбор кадраў. Асаблівую ўвагу трэба звярнуць на павелічэнне прыбытку ад развіцця платных паслуг па пазабюджэтнай дзейнасці, далучаць спонсарскую дапамогу.

 

На імідж раёна працуе турызм
Экспартам турыстычных паслуг у раёне займаюцца дзіцячы санаторый «Расінка», раённая структура беларускага таварыства паляўнічых і рыбаловаў, ТАА «Абстэрна», Дзісненскі лясгас, УП ЖКГ, ПУП «Нікафуд», прыродаахоўная ўстанова «Ельня». У сувязі са складанай эпідэміялагічнай сітуацыяй планавыя заданні яны не выканалі. Колькасць турыстаў, прынятых за студзень – кастрычнік сёлета, у параўнанні з аналагічным перыядам летась знізілася на 2 099 чалавек, замежных – на 305. Усяго палюбавацца на краявіды Міёршчыны прыязджалі
5 306 гасцей. За 10 месяцаў аб’ёмы экспарту турыстычных паслуг раёна ў параўнанні з 2019 годам зменшыліся ў чатыры разы і склалі 20,6 тысячы долараў ЗША, гэта 24,5 % да леташняга ўзроўню.

 
Адзін з перспектыўных відаў турызму – экалагічны. Яго развівае заказнік «Ельня», тут прапануюць экскурсіі ў візіт-цэнтр, на экалагічную сцежку, прагулкі на балотаступах, наведванне месц росту марошкі прыземістай, занесенай у Чырвоную Кнігу, назіранне за матылькамі, стракозамі і журавамі. За бягучы перыяд сёлета «Ельня» сустрэла 336 турыстаў, летась – 564, у тым ліку 78 замежных. Сёлета іншаземцы да нас не прыехалі. У раёне 56 аграэкасядзіб, 13 з якіх зарэгістраваны сёлета. Найбольш іх на тэрыторыі Перабродскага і Міёрскага сельсаветаў. За пяць гадоў яны прынялі звыш 6 тысяч гасцей, з якіх 738 – замежных. Большасць іх з Расійскай Федэрацыі. Былі і з краін далёкага замежжа і Прыбалтыкі. Для павышэння турыстычнага іміджу раёна распрацаваны брэндбук Міёрскага краю, новая сувенірная прадукцыя. У гэтым рэчышчы плануюць развівацца.

 

Наталія СТАНКЕВІЧ

Фота з архіва рэдакцыі.

рейтинг: 
Пакінуць каментар
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 20 января 2021
Василий, Иван, Афанасий

Именины 19 января 2021


Госці краін

free counters
Партнеры сайта