Авторизация
 

Сям'я Зуевічаў з вёскі Ліпанты: дом, дзе жывуць клопат і любоў

 Адказна і клопатна быць бацькамі. Асабліва, калі твае сын ці дачка адрозніваюцца ад большасці. Жыхары вёскі Ліпанты Георгій Пятровіч і Алена Канстанцінаўна ЗУЕВІЧЫ выхавалі пяцярых дзяцей. Двое малодшых сыноў з-за асаблівасцей у развіцці не вучыліся ў школе, не атрымалі прафесію. Аднак яны сталі надзейнай апорай і падтрымкай для пажылых таты і маці. 

 

Прасторны двор Зуевічаў прываблівае чысцінёй і дагледжанасцю. Пазітыўна выглядае афарбаваны ў яркія колеры дом. На падворку шмат клумб, чые межы абазначае дэкор з каляровых пластыкавых бутэлек. Летам тут красуюць кветкі. За некалькі метраў ад двара – абараны на зіму агарод. Крыху далей – сажалка, у якой разводзяць карпаў. Не столькі для кухні, колькі для эстэтыкі. Па ўсім відаць: жывуць тут дбайныя гаспадары.

 
– Хлопцы ўсё робяць. Як пойдуць у пяць раніцы спраўляцца, так да дзевяці ледзь на сняданак іх дачакаюся, – распавядае маці.
Алене Канстанцінаўне 77 гадоў. З мужам Георгіем Пятровічам яны равеснікі. Пажылы гаспадар цяпер на вуліцы мала бывае – ногі баляць. Калісьці сілы шмат меў: 15 гадоў адпрацаваў у калгасе трактарыстам, затым перайшоў на ферму. У вольныя хвіліны любіў у лесе ягады збіраць, на вадаёмах рыбу лавіць. Алена Канстанцінаўна была даяркай. Пасля нараджэння малодшага сына на працу не вярнулася, займалася дзецьмі і хатнімі клопатамі.

 
 У працавітай сям’і выраслі дзве дачкі і трое сыноў. Старэйшая Марына жыве з сям’ёй у Наваполацку, Валянціна бліжэй – у Дзісне. Іван застаўся з бацькамі, працуе ў ААТ «Туркова», часта трапляе на палосы раённай газеты як перадавік вытворчасці. Малодшыя Міхаіл і Аляксандр штодня заняты клопатамі ў хляве, на падворку і палетках.

 
Гаспадарка ў Зуевічаў вялікая. Трымаюць каня, дзвюх кароў, авечак, гусей, курэй. Шмат клопатаў на агародах. Бульба сёлета не вельмі ўрадзіла, затое багата цыбулі розных сартоў, поўная цяпліца памідор была, у кладоўцы значныя запасы свежых капусты і яблыкаў, кансерваваных салатаў. З лесу грыбоў нанеслі хлопцы. Паўсюль яны паспяваюць. І градкі праполяць, і сена насушаць, і жывёлу накормяць і так далей.

 
Міхаілу 42 гады, Аляксандру – 39. Знешне дарослыя і дужыя мужчыны, здольныя справіцца з любой сельскай работай, у душы яны застаюцца чулымі і непасрэднымі дзецьмі. Прыроджаная хвароба не дазволіла ім цалкам сацыялізавацца ў грамадстве, аднак бацькоўская любоў зрабіла шмат. У сваім доме, на сваім падворку Міхаіл і Аляксандр адчуваюць сябе патрэбнымі, важнымі і любімымі. Іх Сусвет – бацькоўская хата, маленькая родная вёска і яе ваколіцы. Тут яны шчаслівыя. І ў большым не маюць патрэбы.
 Для дачок і сыноў Георгій Пятровіч і Алена Канстанцінаўна былі прыкладамі адказнасці і працавітасці. Гэтыя якасці дзеці перанялі сабе.
– Мы любім тату і маму, – шчыра гаворыць Міхаіл.

 
Яму няпроста выказаць пачуцці словамі, затое штодня разам з братам паказваюць удзячнасць на справе.
У выхадныя прыязджаюць у родныя Ліпанты Марына і Валянціна. Далучаюцца да агульных гаспадарчых заняткаў. Наведваюцца да дзядулі і бабулі дарослыя ўнукі Андрэй і Любоў. Сямейная традыцыя – збірацца разам на Вялікдзень.
– Нашых дачок, сыноў і ўнукаў люблю аднолькава, усе для мяне роўныя, за кожнага перажываю, – гаворыць Алена Канстанцінаўна. – Не разумею бацькоў, якія адмаўляюцца ад сваіх дзяцей, у каго іх у прытулкі забіраюць з-за п’янства. Не магу ўсвядоміць, як так можна. Кожнае дзіця заслугоўвае любові і ўвагі.

 
Відавочная ісціна гучыць з вуснаў простай сельскай жанчыны, якая не мела часу чытаць кнігі па педагогіцы і псіхалогіі. У якой у сем гадоў не стала маці, і яна не паспела адчуць усю паўнату мацярынскай любові. Адзіным дарадчыкам у выхаванні сваіх дзяцей было ўласнае сэрца. А яно ніколі не падманвае.

 

Кацярына РЫНКЕВІЧ

Фотаматэрыял Казіміра БЛАЖЭВІЧА.

рейтинг: 
Пакінуць каментар
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 21 января 2021
Василий, Виктор, Владимир, Георгий, Григорий, Дмитрий, Евгений, Емельян, Иван, Илья, Михаил, Юлиан, Василиса, Доминика

Именины 20 января 2021
Василий, Иван, Афанасий

Госці краін

free counters
Партнеры сайта