Авторизация
 

Кулінарыць з эстэтычным ухілам Алена Казачонак з Міёр

 Пячэнне, булачкі і торты Алена Казачонак не купляе. Ласункі да чаю выпякае сама. Гаспадыні важна не толькі смачна прыгатаваць. Шмат увагі надае афармленню. Эстэтычныя пачастункі любяць родныя і госці.

Гатаваць Алена Фёдараўна любіць з дзяцінства. Сама не ведае, чаму пасля школы вырашыла вучыцца на швачку. У швейнай справе затрымалася на два гады. Цяпер працуе сястрой-гаспадыняй у тэрапеўтычным аддзяленні раённай бальніцы, а вольны час прысвячае хобі.


– Розныя стравы гатаваць падабаецца: мясныя і рыбныя запяканкі, салаты і бліны. Выпечку калі не штодня, то праз дзень абавязкова раблю. Муж і сын любяць, калі да чаю смачненькае ёсць, – расказвае субяседніца.


 З усмешкай прыгадвае свой першы кулінарны вопыт. Дзяўчынка-трэцякласніца вырашыла зварыць суп. Сала не пашкадавала. Каб не расстройваць малую, бацькі зрабілі выгляд, што смачна. Цяпер ва ўмелай гаспадыні і хлеб з мульціваркі духмяны выходзіць, і казінакі ўдаюцца. Задумала прыгатаваць торт-снікерс.


Торты – салодкая фішка Алены Казачонак. Гэта ўпрыгожванне кожнага сямейнага і каляндарнага свята, арыгінальны падарунак для блізкіх і сяброў. Ідэі па афармленні знаходзіць у інтэрнэце ці прыдумвае сама. Працэс прыгатавання займае тры дні.


– Спачатку выпякаю бісквіт. Рэцэпт просты: чатыры яйкі, па 250 грам цукру і мукі. Яйкі з цукрам узбіваю міксерам, а муку перамешваю лапаткай. Гатовы бісквіт пакідаю на шэсць – восем гадзін, – расказвае гаспадыня. – На другі дзень праслойваю каржы. Тут шмат варыянтаў: тварог з ананасамі, згушчонка са сметанковым маслам, вяршкі з тварагом, смятана з цукрам, тварожны сыр. Трэці дзень – афармленне. Бялковы крэм гатую сама, фарбавальнікі і насадкі купляю ў спецыялізаваных магазінах. «Размалёўваю» торт гадзіны чатыры.


Пра затрачаны час гаспадыня не шкадуе, любы этап прыгатавання дорыць задавальненне. Тэлевізар ці музыку для фону не ўключае. Гэта лішняе. На кухні заўжды хто-небудзь ёсць. Ці сын-адзінаццацікласнік Жэня (на здымку), ці муж Сяргей Альгердавіч, ці маці Рэгіна Антонаўна, ці ўсе разам. З цікавасцю назіраюць за працэсам, размаўляюць. Так хобі сумяшчаецца з вечарамі ў коле любімай сям’і.


 Старэйшая дачка Вольга жыве ў Полацку і разам з мужам сочыць за мамінай кулінарнай творчасцю праз інтэрнэт. Фотаздымкі ласункаў Алена выкладае на сваіх старонках у сацыяльных сетках.
Уся сям’я збіраецца разам на святы. Меню штораз новае. Ёсць і традыцыйныя стравы. Так, на навагоднім стале абавязковыя запечаная курыца і салата «Аліўе». Што да падарункаў, гаспадыню радуюць рэчы для кулінарыі.


Аднак гэта не адзінае захапленне. З той жа любоўю, з якой замешвае цеста для булачак, Алена Фёдараўна даглядае вулічныя кветкі. Летам ля дома красуюць 12 кустоў хрызантэм. На агародзе, у цяпліцах і ў хлеўчуку спраўляюцца сям’ёй. Зімовыя вечары любіць за тое, што можна больш часу праводзіць на кухні.


Гаспадыня частуе тортам. Аплецены ўзорам і аздоблены лілеямі ласунак выглядае вельмі прывабна і апетытна. Глядзіш на смакату, і ўзнікае дваякае пачуццё: хочацца хутчэй паспрабаваць і шкада парушаць такую прыгажосць. Лёгкі бялковы крэм, пышныя бісквітныя каржы, праслойка з варанай згушчонкі і арэхаў. Усё разам – неймаверная асалода!


Менш салодкія, але такія ж смачныя і сімпатычныя імбірныя пернікі ў выглядзе навагодніх цацак. Без гэтага ласунку ў сям’і не абыходзяцца зімовыя святы.

Імбірныя пернікі

Спатрэбіцца:

v 100 г цукру,
v 150 г мёду,
v 125 г сметанковага масла тлустасцю 82,5 %,
v па 1,5 чайнай лыжкі карыцы, молатага імбіру, мускатнага арэха (на густ можна дадаць молатыя перац і гваздзік), соды,
v 500 – 550 г мукі.

 Для глазуры:

v 1 яечны бялок,
v 200 – 250 г цукровай пудры.
Змяшаць міксерам на нізкіх абаротах. Дадаць харчовыя фарбавальнікі.

Гатуем

Цукар і мёд пакласці ў каструлю з тоўстым дном. Дадаць спецыі.
Растапіць на вельмі марудным агні, не даводзячы да кіпення.
Калі сахар пусціцца, дадаць па чарзе масла і соду.
Перамяшаць да аднароднай масы, зняць з агню і астудзіць да пакаёвай тэмпературы.
Паступова дабаўляць муку.
Замясіць мяккае эластычнае цеста. Сфармаваць з яго шар, загарнуць у харчовую плёнку і пакласці на восем гадзін у халадзільнік. Гэта трэба для таго, каб цеста набыло трываласць і не крышылася.
Далей раскатваем пласт таўшчынёй у адзін – паўтара сантыметра. Выразаем фігуркі. Выкладаем на бляху (змазваць яе не трэба!). Выпякаем 10 – 12 хвілін пры тэмпературы 180 градусаў.
Калі пернікі астылі, паліваем глазурай.

Фотаматэрыял аўтара і з асабістага архіва Алены КАЗАЧОНАК.

Кацярына РЫНКЕВІЧ.

рейтинг: 
Пакінуць каментар
иконка
Каментаваць артыкулы на нашым сайце магчыма толькі ў плыні 360 дзён з дня публікацыі.
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 18 мая 2021
Адриан, Ирина, Яков

Именины 17 мая 2021
Иван, Исаакий, Кирилл, Климент, Леонтий, Никита, Николай, Мария, Пелагея

Госці краін

free counters
Партнеры сайта