Авторизация
 

Прафесійнае свята супрацоўнікі Міёрскага аддзялення аховы сустрэлі ў пашыраным саставе

 Служба аховы звычайна асацыіруецца з міліцэйскай формай, сінімі пробліскавымі маячкамі патрульных машын і нямецкімі аўчаркамі. Між тым сваю вахту на пастах нясуць вартаўнікі, перадаюць аператыўную інфармацыю групам затрымання дзяжурныя на пульце, пра стан ахоўнай сігналізацыі клапоцяцца электраманцёры. Святочны дзень сёння ў кожнага. 

Новыя кадры, службовыя поспехі, высокія адзнакі

 – Наш калектыў павялічыўся да 87 супрацоўнікаў, – адзначае начальнік аддзялення Міхаіл Пракопчык. – З’явіліся два новыя ахоўныя пасты: у аддзеле прымусовага выканання і на металапракатным заводзе. На апошнім заняты дзесяць вартаўнікоў, працуюць па два ў змену.


Міліцэйскую форму носяць 25 супрацоўнікаў службы аховы. Пасля падрыхтоўкі ў вучэбным цэнтры прыступілі да абавязкаў Анатоль і Мікалай Мацюкі, Юрый Юхноўскі, Віктар Федуковіч. У хуткім часе чакаюць яшчэ аднаго навучэнца.


Абавязкі ў міліцыянераў не змяняюцца: парадак на ўзятых пад ахову аб’ектах, кантроль за вартаўнікамі на іншых установах і прадпрыемствах, забеспячэнне грамадскага парадку на вуліцах. З пачатку года выявілі больш за 350 адміністрацыйных правапарушэнняў. Найлепш спрацавалі Сяргей Даронда, Юрый Рубанік, Васіль Маісееў, Іван Вішнеўскі. У раскрыцці злачынстваў вызначыліся Сяргей Вішнеўскі і Віктар Стома.


Спроб пранікнуць на аб’екты пад аховай сёлета не здаралася. Дарэчы, сваё жыллё і маёмасць даверылі міёрскаму аддзяленню яшчэ 14 домаўладальнікаў.


  Папярэдзіць крадзяжы – адна з задач вартаўнікоў. Ажыўлены рух на будаўніцтве металапракатнага завода. Першы пункт на пляцоўцы – пост аховы. Аглядае машыны на выездзе Валерый Аніська. Зазірне ў кабіну, правядзе люстэркам пад днішчам. Інструмент Віктара Заблоцкага – металадэтэктар. Ім правярае ўсіх, хто не за рулём. Здараліся выпадкі, калі з тэрыторыі прадпрыемства спрабавалі вынесці металічны кабель.


Асноўнае месца службы Ады Мароз – ахоўны пункт на мясакамбінаце. Амаль трыццаць гадоў на пасту. Зарэкамендавала сябе старанным і адказным работнікам. Станоўча характарызуе кіраўніцтва яе калег Зою Мацур, Таццяну Сіповіч.


Упэўнена трымаюць руку на пульце дзяжурныя Алена Шаркель, Ірына Закрэўская, Алена Радзюк. Вопытныя і аператыўныя, яны перадаюць свае ўменні маладым калегам. Дзякуючы старанням спрактыкаваных электраманцёраў Леаніда Пруднікава, Валерыя Кубаркі, Юрыя Сташулёнка ў парадку ахоўнае абсталяванне.


Памятаюць у аддзяленні пра ветэранаў. У іх ліку Сяргей Тронькін, Генадзь Сушко, Раман Фурс, Ігар Войтаў, Сяргей Мягі.
– Ім асобныя словы ўдзячнасці. Багаты вопыт і закладзеныя традыцыі перадаюць маладым. Пакінулі добрую матэрыяльна-тэхнічную базу, якую мы падтрымліваем і ўдасканальваем, – гаворыць Міхаіл Пракопчык. – Усіх калег віншую з прафесійным святам. Удзячны за належнае выкананне службовых абавязкаў і гатоўнасць прыступіць да іх у любы час. Самыя шчырыя пажаданні здароўя, сямейнага дабрабыту, поспехаў на службе.


Некаторыя супрацоўнікі да прафесійнага свята атрымалі ўзнагароды. Нагрудным знакам «За адзнаку» ўзнагароджаны міліцыянер-кінолаг Павел Шанін. Яго старэйшаму калегу Віктару Стому аб’явілі падзяку абласнога ўпраўлення. Кіраўніцтва Міёрскага РАУС адзначыла міліцыянера-кінолага Івана Вішнеўскага і міліцыянера-вадзіцеля Дзяніса Лакотку.

 Падказка да месца

У Дзяніса Лакоткі была магчымасць стаць пагранічнікам. Калі праходзіў тэрміновую службу ў Смаргоні, прапаноўвалі застацца на кантракт. Міярчаніна вабілі родныя мясціны.


– Пайсці ў ахову падказаў сусед. Ён тут працуе. Прапанова зацікавіла, параіўся з бацькамі, яны падтрымалі, – успамінае Дзяніс пра пачатак службовага шляху. – Вадзіцельскія правы меў, пасля школы скончыў Глыбоцкі прафліцэй. Накіравалі ў вучэбны цэнтр Дэпартамента аховы. Да дысцыпліны, фізічных нагрузак і строгага распарадку дня прывыкаць не давялося. Гэта знаёма з арміі.


У Міёрскае аддзяленне аховы малады міліцыянер вярнуўся ў сакавіку 2017-га. Яго месца – за рулём. Гэтым абавязкі не абмяжоўваюцца. Затрымліваючы на вуліцы парушальнікаў грамадскага парадку, не раз сутыкаўся з грубасцю і агрэсіяй. Даводзілася даганяць нецвярозага кіроўцу.


– Каб служыць у ахове, патрэбны не толькі добрае фізічнае здароўе і вынослівасць. Важна мець трывалыя нервы, быць знаходлівым і хутка прымаць рашэнні. І яшчэ – умець будаваць адносіны з людзьмі, – разважае субяседнік. – Ёсць свае складанасці, аднак у цэлым спраўляюся. Дзяжурствы праходзяць па-рознаму. Калі выездаў больш, час незаўважна пралятае, калі ўсё спакойна – цягнецца даўжэй.


У вольны час Дзяніс любіць павудзіць рыбу на вадаёмах або паганяць мяч на футбольным полі. Але цяпер застаецца дома. Нядаўна ў маладой сям’і нарадзіўся першынец-сынок. Маленькаму патрэбна ўвага і мамы, і таты.

Фотаматэрыял Казіміра БЛАЖЭВІЧА.

Кацярына РЫНКЕВІЧ.

рейтинг: 
Пакінуць каментар
иконка
Каментаваць артыкулы на нашым сайце магчыма толькі ў плыні 360 дзён з дня публікацыі.
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 17 апреля 2021
Адриан, Вениамин, Георгий, Иван, Иосиф, Никита, Николай, Федор, Мария

Именины 16 апреля 2021
Никита

Госці краін

free counters
Партнеры сайта