У свой выхадны Дзмітрый ВАСІЛЕНКАнаводзіў парадак на вясковай вуліцы. У Пад’ельцах на скрыжаванні вуліц Дворнасельскай і Лясной з савецкіх часоў засталася масіўная высокая стэла. Вакол яе – зялёны астравок. Усё вышэй і вышэй цягнулася трава.
БУДНІМ днём заўважылі ля стэлы маладога чалавека з трымерам. Пазналі мясцовага жыхара і нашага няштатнага аўтара Дзмітрыя Васіленку. Ён старанна абкасіў ля стэлы і ў кювеце праз дарогу. Сабраў смецце. Шырокае вядро даверху напоўнілася шклянымі і пластыкавымі бутэлькамі.
– У маі таксама абкошваў і прыбіраўся тут. А раз пачаў, трэба працягваць, – гаворыць Дзмітрый. – Жыву паблізу. Хочацца, каб парадак панаваў не толькі ў сваім двары, але і побач. Прырода і праблемы экалогіі мне блізкія. Па адукацыі – географ.
ПРАЦУЕ Дзмітрый у школе ў Чапуках. Цяпер заняты ў летнім лагеры. Сярод тыдня выпаў выхадны, вырашыў зрабіць добрую справу.
Актыўнічае не толькі дома. Вясной дапамагаў прыбіраць тэрыторыю ля сядзібнага комплексу і панскіх канюшняў у Камянполлі. Па ініцыятыве Дзмітрыя ў мінулым годзе Чапукоўская школа далучылася да праекта «Новая жизнь в обмен на крышечки».