Авторизация
 

Дзень Ксеніі КАГУКІНАЙ распісаны па гадзінах

 Дзень Ксеніі КАГУКІНАЙ распісаны па гадзінах. У асобным сшытку на тыдні наперад размеркавана, хто і ў які час прыйдзе на манікюр. Вучыцца прафесіянальнаму манікюру Ксенія пачала два гады таму. Для сябе. Курсаў не заканчвала. Падручнікам быў інтэрнэт. Тады не думала, што новае хобі хутка ператворыцца ў асноўны занятак.

РАБОЧАЕ месца майстра па манікюры знаходзіцца дома. На спецыяльным століку – рознакаляровыя лакі, бусінкі, стразы і стужачкі для дэкору, манікюрны апарат, УФ-лямпа для сушкі, стойка з узорамі.


– Як правіла, кліенты прыходзяць са сваімі прапановамі. Адным хочацца свята на пазногцях – яркіх колераў, арыгінальнага дэкору. Іншыя выбіраюць спакойныя адценні без мудрагелістых упрыгожанняў. Многім падабаюцца малюнкі, – расказвае Ксенія. – Узрост наведвальнікаў розны. Ад старшакласніц да жанчын за шэсцьдзясят. Камусьці манікюр патрэбны для пэўнай нагоды. На выпускны, вяселле ці юбілей. Большасць жадае цешыцца прыгожымі ручкамі пастаянна.


У Ксеніі каля сотні кліентаў. Прыходзяць дзісенцы, прыязджаюць з ваколічных вёсак. Рэклама не спатрэбілася. Спрацавала сарафаннае радыё.


Працэдура займае дзве гадзіны, таму за дзень прымае максімум пяць чалавек. Апошні нярэдка садзіцца ў крэсла ў сем – восем гадзін вечара. Ідзе насустрач наведвальнікам, падстройваецца пад іх час.


Нарошчванне, пакрыццё, афарбоўка, малюнкі і дэкор – усё гэта справа тонкая. Патрабуе цярплівасці і ўседлівасці. З чужымі рукамі Ксенія працуе ўпэўнена. Даўно прайшло хваляванне, што падступала напачатку.


 – Па адукацыі я культработнік, раней працавала ў Дзісенскім ГЦК. Як фізічная асоба зарэгістравалася ў падатковай інспекцыі год таму. Усё аказалася проста, без залішняй бюракратыі, – гаворыць субяседніца. – Да гэтага рабіла манікюр сваім родным, сяброўкам. Наўрад ці сама рашылася б распачаць уласную справу. Муж параіў. Дапамог абсталяванне закупіць. І цяпер Жэня часцей за мяне бывае ў спецыялізаваных магазінах у Полацку і Наваполацку, адкуль прывозіць неабходныя для работы матэрыялы.


СЯМ’Я Кагукіных у Дзісне пражывае дзесяць год. Ксенія мясцовая, Яўген родам з Полацка. Сын Віктар скончыў сёмы клас Мінскага ліцэя Міністэрства ўнутраных спраў. Паступіць у гэтую ўстанову вырашыў сам. Дома бывае толькі на канікулах. Удалечыні ад таты і мамы няпроста, але спраўляецца.


Жыць у маленькім гарадку – агульнае рашэнне. Выбралі цішыню замест дакучлівага гарадскога шуму. Пераехалі сюды і бацькі Яўгена.
Спачатку маладая сям’я здымала жыллё, пакрысе будавалі ўласны дом. Цяпер пад сваім дахам. Добраўпарадкоўваюць падворак, трымаюць невялікую гаспадарку. Гадаванцаў даглядае гаспадар, на гародчыку гаспадыня завіхаецца.


РАБОТА на зямлі – у пальчатках. Такое правіла абавязковае для Ксеніі і яе кліентак. Яшчэ раіць карыстацца крэмам для рук і спецыяльным маслам для куцікулы, што замаруджвае яе рост. Клопатаў на кухні і па доме манікюр не баіцца. Трымаецца да паўтара месяца. Пасля – за абноўкай.


– Часам дзяўчаты цікавяцца, ці не жадаю заняцца карэкцыяй броваў. Гэта не маё. Знайшла сябе ў манікюрнай справе. Вынікам работы ўсе застаюцца задаволеныя. Аказваецца, можна без спецыяльных курсаў абысціся. Галоўнае – жаданне і пастаянная практыка, – разважае субяседніца. – Можна было б адчыніць у Дзісне салон з больш шырокім колам паслуг. Дзе рабілі б прычоскі, манікюр, прыводзілі ў парадак бровы і вейкі. Але для гэтага патрэбна кампанія ўмельцаў. Адной зручней прымаць дома.
РАЗМОВУ перапыняе стук весніц. Майстар ідзе сустракаць кліентку.


– Ужо год да Ксеніі хаджу. Падабаецца, – гаворыць жыхарка Дзісны Зоя Кавалеўская. – Манікюр месяц трымаецца. Гэта зручна. На агародзе ў пальчатках працую. А больш ніякіх правіл. Прыемна , калі рукі дагледжаныя, акуратныя.


Зоя Кавалеўская з тых кліентак, што поўнасцю давяраюць фантазіі і ўмельству майстра. Разам выбіраюць з палітры колераў патрэбны варыянт, і пачынаецца работа. Карпатлівая, займальная, творчая. Праз дзве гадзіны ў майстра і кліенткі з’явіцца нагода для ўсмешкі і добрага настрою.

Фота Казіміра БЛАЖЭВІЧА.

Кацярына РЫНКЕВІЧ.

рейтинг: 
Пакінуць каментар
иконка
Каментаваць артыкулы на нашым сайце магчыма толькі ў плыні 360 дзён з дня публікацыі.
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 17 апреля 2021
Адриан, Вениамин, Георгий, Иван, Иосиф, Никита, Николай, Федор, Мария

Именины 16 апреля 2021
Никита

Госці краін

free counters
Партнеры сайта