Авторизация
 

У Міёрах дзейнічае майстэрня "Лаўка цудаў"

 У майстэрні "Лаўка цудаў", што дзейнічае ў тэрытарыяльным цэнтры сацыяльнага абслугоўвання насельніцтва, утульна і пахне творчасцю. Тут займаюцца наведвальнікі аддзялення дзённага знаходжання для інвалідаў і суправаджальнага пражывання. Лепяць з гліны, малююць па дрэве.

Паралельны свет творчасці
ДЗВЕРЫ ў "Лаўку цудаў" нібы ўваход у паралельны свет. На вуліцы калючы вецер, гул машын, заклапочаныя прахожыя. У майстэрні — цёпла і светла, гучыць радыё, на паліцах і сталах красуюцца гліняныя аловачніцы, вазончыкі, званочкі. Яшчэ тут "расце" незвычайнае дрэва. Ствол і галіны з тканіны. Замест лісця — гліняныя фігуркі жывёл, размаляваныя стракатымі фарбамі.
ПРЫВЕТНАЙ усмешкай сустракаюць гаспадыня майстэрні Алена Плехтан і яе памочнікі.


 — У нас два творчыя накірункі: жывапіс па дрэве і кераміка. Сувенірную прадукцыю прадстаўляем на розных выставах і мерапрыемствах. Яна карыстаецца попытам. Нашы вырабы ра-з'язджаюцца не толькі па Беларусі. Трапілі ў Расію, Германію, ЗША, — расказвае Алена Анатольеўна. — Удзельнічаем у творчым абласным конкурсе "Сонечны свет для ўсіх". Пакуль што ў нас другое і трэцяе месцы. Ёсць стымул да перамогі.


ГЛІНА ў руках Алены Плехтан яшчэ са школьнай пары. Наведвала заняткі ў дзіцячай школе мастацтваў. Спецыяльнасць мастака па кераміцы атрымала ў віцебскім прафесійна-тэхнічным каледжы, затым паступіла на мастацка-графічны факультэт ВДУ імя П.М. Машэрава. Працягвае займацца любімай справай і захапляе ёй іншых. Напрыклад, Юрый Савуць калісьці зусім не меў уяўлення пра работу з глінай. Цяпер у яго атрымліваюцца акуратныя і прыгожыя сувеніры. Анастасіі Кулянок падабаецца ляпіць фігуркі жывёл. Наталля Дубік гаворыць, што ёй больш па душы вышыўка, але і з глінай займацца цікава.


 Майстар-клас
КАЛІ раней бачыла дэкаратыўныя гліняныя званочкі з выявай міёрскага касцёла, мне здавалася, што зрабіць іх вельмі складана. Зараз праверым, як на самой справе.
Садзімся за стол разам з Аленай Анатольеўнай, Юрыем, Анастасіяй і Наталляй. Перад кожным — прамавугольны кавалак анучы. На ім будзем раскатваць гліну. Яна побач у вялікім чорным поліэтыленавым пакеце.


— Гліну закупляем на Обальскім керамічным заводзе. Яна ачышчаная ад прымесяў, таму падатлівая і вырабы атрымліваюцца трывалымі, — гаворыць Алена Плехтан. — Тая гліна, што ў нас пад нагамі, для творчасці не вельмі падыходзіць. Хоць у дзяцінстве я спрабавала з такой працаваць.


ДЛЯ будучага званочка гліну трэба раскатаць раўнамерна таўшчынёй прыкладна ў тры міліметры. Затым на яе прыкладваецца шаблон з паперы. Па контуры акуратна выразаем фігуру. Злучаем яе канцы—атрымліваецца ўсечаны конус.
У якасці клею выкарыстоўваем гліну, разведзеную вадой да кансістэнцыі смятаны.
— Падобна на кандытарскі крэм, — заўважаю майстрам.
— Я гэту сумесь шакаладкай называю, — смяецца Насця.
— Гліняны клей называецца шлікерам, — нагадвае Алена Анатольеўна.


 З АСНОВАЙ званочка ўсё зразумела. А як зрабіць касцёл? Раскатваем яшчэ адзін кавалак гліны. Зноў накладаем папяровы шаблон—выяву касцёла. Цяпер выразаць трэба акуратней: фігурка меншая, а выступаў больш. Няроўнасці пасля можна змачыць вадой і разгладзіць. Адзін бок глінянага касцёла змазваем шлікерам і прымацоўваем да конуса. Крыжы і абрысы дзвярэй наносім ножычкам, а вокны злёгку выціскаем спецыяльнай прыладай, якая называецца стэка.


 ЦЯПЕР трэба "пасадзіць" дрэвы. Кавалачак гліны націраем на звычайнай кухоннай тарцы. З дапамогай шлікера прымацоўваем стружку па абодвух баках ад выявы касцёла. Апошнія штрыхі — крышачка, шарык для званка і дэкаратыўны элемент, на якім фарбай напішуць "Міёры".
— Вырабы з мясцовай сімволікай — гэта наша візітная картка,—заўважае Алена Плехтан.


КАЛІ гліняныя званочкі высахнуць, іх абпаляць у муфельнай печы, затым пафарбуюць асобныя элементы і пакрыюць лакам. Аднак і на "паўфабрыкат", зроблены сваімі рукамі, прыемна любавацца.


***
За гадзіннікам не сачыла—творчасць не церпіць часавых рамак. Напэўна, прайшла гадзіна. За цікавым заняткам, за нязмушанымі гутаркамі, у прыемнай атмасферы. Зусім не хацелася на вуліцу. Туды, дзе халодны вецер і бясконцая мітусня, у якой мы ўпускаем столькі цудоўнага.

ДАРЭЧЫ. На базе аддзялення дзённага знаходжання для інвалідаў і суправаджальнага пражывання тры працоўныя майстэрні. Акрамя "Лаўкі цудаў" дзейнічаюць "Фотапалітра" і "Займальная працатворчасць". У апошняй ствараюць вырабы з газетных трубачак, дамавічкоў. Ёсць каталог творчай прадукцыі. Сувеніры можна набываць у падарунак сабе, родным, сябрам.

 

Фотаматэрыял Казіміра БЛАЖЭВІЧА.

Кацярына РЫНКЕВІЧ.

рейтинг: 
Пакінуць каментар
иконка
Каментаваць артыкулы на нашым сайце магчыма толькі ў плыні 360 дзён з дня публікацыі.
Мы ў сацыяльных сетках
  • Камэнтуюць
  • Актуальна
  • Чытанае

Рэцыдыў

  • 09 ноябрь 2010, 11:17
  • 98 629
  • 0

Злавілі рыбку, ды… залатую

  • 28 февраль 2011, 16:16
  • 94 966
  • 0

Інвестыцыйны форум

  • 23 сентябрь 2011, 10:05
  • 90 691
  • 1

  • 11 февраль 2011, 11:20
  • 43 652
  • 0

Пераброддзе 2012. Погляд вучонага

  • 31 август 2012, 15:19
  • 42 723
  • 0

Кандыдатамі жадаюць стаць

  • 21 август 2012, 15:30
  • 36 770
  • 0

Вагон "вярнуўся"

  • 11 июнь 2013, 10:04
  • 0
  • 2

Пра тых, хто акты рэгіструе

  • 19 декабрь 2012, 09:24
  • 0
  • 2

Трагічны люты

  • 01 март 2011, 09:00
  • 25 923
  • 2
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 5 декабря 2020
Алексей, Архип, Борис, Василий, Владимир, Герасим, Иван, Илья, Максим, Марк, Михаил, Павел, Петр, Фаддей, Федор, Прасковья, Афанасий, Яков

Именины 4 декабря 2020


Госці краін

free counters
Партнеры сайта