Народные традиции и знаменитые люди Новопогостского края

 У Новапагосцкай школе гаварылі пра землякоў, якія праслаўлялі і праслаўляюць родны край, сваю малую радзіму. Літаратурна-музычную кампазіцыю ім прысвяцілі географ Людміла БЯЛЕВІЧ і біёлаг Марына ЛАПКОЎСКАЯ. 

ЗАВІТАЎ на мерапрыемства лаўрэат звання “Чалавек года Віцебшчыны-2017”, ляснічы Новапагосцкага лясніцтва Мікалай Мішук. Гаварыў пра сваю справу, якая не прымае абыякавых і патрабуе шмат вытрымкі. Бібліятэкар з Волкаўшчыны Таццяна Казлоўская расказала пра выхадца з гэтай вёскі Аляксандра Купрыянавіча Сіповіча, мастацкага кіраўніка заслужанага аматарскага калектыву Рэспублікі Беларусь ансамбля народнай песні “Бліскавіца”. Цяпер ён на заслужаным адпачынку, пражывае ў Гродна.


ТВОРЧЫ энтузіязм, беражлівыя адносіны да беларускага песеннага фальклору вылучаюць народны гурт “Купалінка” Каўшэлеўскага Дома фальклору, якім кіруе Надзея Вайцюль. Яна распавяла пра гісторыю калектыву, што бярэ адлік з 1989 года. Тады людзі розных прафесій аб’ядналіся, каб вывучыць мясцовы фальклор, удзельнічаць у народных абрадах. Разам з народнымі спяваюць песні на вершы мясцовых паэтаў.


 Родам з перабродскіх мясцін заслужаны артыст БССР Васіль Іосіфавіч Юневіч. Пра яго расказала краязнаўца Наталія Самсановіч. Нагадала біяграфію земляка, які не забываўся на свае карані. У памяць пра спевака стварыла экспазіцыю ў школьным музеі.


ПРЫЕМНЫЯ ўражанні падарылі пераможцы раённага конкурсу “Уладар сяла” шматдзетная сям’я Цітовічаў са Старога Пагоста. Мікалай і Яўгенія ў вольны час разам з дзецьмі падарожнічаюць на ўласным аўтамабілі, любуюцца краявідамі. Бацькам і дзецям сельскі лад па душы. Паказалі відэаролік пра жыццё-быццё. Сапраўдныя гаспадары на роднай зямлі, працавітыя і дружныя.


За гадзіну ўрачыстасці не пералічыць усіх вядомых і славутых землякоў. Міёршчына на іх багатая. Нам цікава ведаць мінулае родных мясцін і імёны, якімі ганарымся.

На здымках: Надзея Вайцюль (злева) і Людміла Бялевіч зберагаюць народныя традыцыі. Удзельнікі сустрэчы.

 
Эла МАРКЕВІЧ,
юнкар гуртка “Зараначка”

Новапагосцкай ДС-СШ.

0 комментариев

Добавить комментарий

Информация
Комментировать статьи на сайте возможно только в течении 360 дней со дня публикации.