Авторизация
 

Некалькі згадак пра Міёры ў 1940-ых гадах з успамінаў Барыса Манцэвіча

 Барыс Манцэвіч пра сябе паведамляе, што нарадзіўся на Міёршчыне  ў 1933 годзе ў сям’і сельскіх настаўнікаў. Бацьку Флора Данатавіча немцы расстралялі ў 1941-м. Маці, Аляксандра Міхайлаўна, удзельнічала ў падпольным і партызанскім руху, арганізавала  падпольны партызанскі атрад “Масква”, у якім з’яўлялася камісарам. У пасляваенны час яна стварала першы на Міёршчыне  дзіцячы дом у Александрове.

Барыс Флоравіч закончыў Міёрскую СШ, а потым — факультэт журналістыкі БДУ, працаваў у раённых газетах у Вілейцы і Бярэзіне. З 1947 года вёў дзённік, які дазволіў яму летась выдаць кнігу “Скрыжалі майго маленства”. Аўтар вызначыў жанр твора як ваенныя ўспаміны хлопчыка з Міёршчыны. З імі варта пазнаёміцца старажылам Старых Крукоў, Чэрасаў і навакольных вёсак, усім, хто цікавіцца разгортваннем партызанскага руху ў нашых мясцінах. Я ж сярод радкоў дзіцячых успамінаў шукаў драбінкі звестак пра Міёры з канца 1939 года да пачатку вайны, таго перыяду, дакументальных сведчанняў пра які захавалася не так шмат.

  
Савецкая ўлада замацавалася ў нашых мясцінах у верасні 1939-га, але новыя парадкі набывалі канкрэтныя абрысы паступова. Так, пэўны час яшчэ аказвалі медыцынскую дапамогу насельніцтву прыватныя медыкі. Барыс Манцэвіч называе ў Міёрах “слаўнага доктара Шчаснага”, які і яго асабіста ўратаваў ад шкарлятыны.

  
Цэнтральная плошча напачатку 1940-га з’яўлялася рынкам, на якім мясцовыя жыхары куплялі агародніну, садавіну (дарэчы, у Міёрах садоў было мала) і мяса-малочныя прадукты. Тут жа на каланчы пільна неслі варту пажарныя, якія неадкладна выязджалі на параконцы, калі заўважалі паблізу дым.

  
Вуліцы мястэчка амаль усюды былі забрукаваны, бетоннымі пліткамі выкладзены ходнікі-тратуары.
У 1940-м райцэнтр актыўна забудоўваўся, людзі ўзводзілі новыя хаты, перавозілі старыя з навакольных вёсак. Вось тады з’явілася вуліца ад возера да “конскага рынку”, яна і цяпер носіць назву Савецкай.

  
Кіно для жыхароў Заходняй Беларусі было небывалым цудам. Многія здзіўляліся, як гэта жывыя людзі могуць хадзіць па сцяне і размаўляць. Фільмы ў Міёрах пачалі паказваць у клубе, які дзейнічаў у звычайным драўляным доме паміж школай-сямігодкай, будынак якой і цяпер стаіць над возерам, і збожжаскладам, узведзеным з пустакоў (таксама захаваўся!). Там, у прыватнасці, дэманстравалі здымкі аб знаходжанні ў Маскве Паўнамоцнай камісіі Народнага сходу Заходняй Беларусі. Міярчане, і сям’я Манцэвічаў у тым ліку, пабачылі, як Флор Данатавіч у складзе той камісіі ідзе насустрач Сталіну, як фатаграфуюцца з членамі Палітбюро.

  
Флор Данатавіч працягваў дзяліцца ўспамінамі з міярчанамі аб сваім выступленні з дакладам на Народным сходзе ў Беластоку і ўдзеле ў рабоце Паўнамоцнай камісіі. А 1 мая 1941 года на ўрачыстым сходзе местачкоўцаў ён выступіў з палымянай прамовай. Відавочцы нават пасля вайны ўспаміналі пра эмацыянальнае выступленне, якое кожнага закранула за сэрца.


Недзе ў той час міярчане не толькі пабачылі, нават памацалі першы самалёт. Кукурузнік зрабіў круг над мястэчкам і прызямліўся на часовым аэрадроме ля вёскі Міёркі, дзе адразу сабраўся натоўп. “Не інакш гэта прыляцеў на дапамогу мясцоваму хірургу нехта з кваліфікаваных дактароў Вілейскай абласной бальніцы”, — выказвае меркаванне Барыс Манцэвіч.


Адзіным прадпрыемствам райцэнтра была невялічкая фабрыка па вырабе запалкавай саломкі паблізу чыгункі, якую пабудаваў купец Агенштат. Яна працягвала дзейнічаць і пры савецкай уладзе. Гудок на абед на ёй чуўся за два кіламетры.

Фота пажарнай каланчы зроблена ў нядаўнія гады. Здымак з інтэрнэта.
Падрыхтаваў Леанід МАТЭЛЕНАК.

рейтинг: 
Пакінуць каментар
иконка
Каментаваць артыкулы на нашым сайце магчыма толькі ў плыні 360 дзён з дня публікацыі.
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 8 мая 2021
Василий, Марк, Сергей

Именины 7 мая 2021
Алексей, Валентин, Иннокентий, Иосиф, Леонтий, Николай, Сергей, Елизавета

Госці краін

free counters
Партнеры сайта