Авторизация
 

Часлаў ШУЛЬГА з Туркова — пасол Рэспублікі Беларусь у Расійскай Федэрацыі

   Як сельскі хлопчык з вёскі Гараўцы Туркоўскага сельсавета стаў паслом Рэспублікі Беларусь у Расійскай Федэрацыі. Кар’ерную лесвіцу старшы саветнік, кіраўнік аддзялення пасольства Рэспублікі Беларусь у Расійскай Федэрацыі Часлаў ШУЛЬГА адолеў лёгка, дасягнуўшы яе вяршынь. 

 

Сакрэт поспеху — у працавітасці і адказнасці за даручаную справу, якія закладзены ў дзяцінстве. Дапамагаць бацькам тады лічылася не правам — абавязкам. Пасол памятае, як у першым класе пасвіў авечак і на гэтым зарабіў свой першы рубель. Большыя грошы з таварышамі-аднакласнікамі знаходзілі літаральна пад нагамі: збіралі журавіны на балоце. Прырода на Міёршчыне — сапраўдны скарб, яе немагчыма не любіць, да яе немагчыма не вяртацца.

З НЕПАДРОБНЫМ захапленнем Часлаў Шульга згадвае пра родную туркоўскую зямлю:
— Мясціны прывабныя: лес, балота, рэкі. Што можа быць лепш для духоўнага сталення?! З маленства спасціг дабрыню і працавітасць, сельскую працу. Бацькі прывучалі кожную справу выконваць якасна, добрасумленна. Упэўнены, што гэтыя азы і скіравалі мяне па жыцці. Дарагія сэрцу мясціны вабяць і зараз. Хоць не часта, але сюды прыязджаю. Цікава паглядзець на змены, новую інфраструктуру. Тут жыве радня, якую бязмежна люблю.


Часлаў Казіміравіч памятае вясёлыя будні ў Туркоўскай школе, удзячны сваім настаўнікам. Усе прадметы яму спатрэбіліся ў жыцці, а веды па іх сталі адпраўным пунктам у вялікі свет. Асабліва сябраваў з матэматыкай і фізікай, якія з лёгкасцю здаў пры паступленні ў Беларускі дзяржаўны політэхнічны інстытут.


Выбраў аўтатранспартны факультэт. Відаць, паўплывала не толькі цікаўнасць юнака да тэхнікі, але і тое, што тата быў вадзіцелем. У вучобе Часлаў Шульга вызначаўся стараннем. І вынес з інстытута галоўную ісціну:
— Вучыцца, самаадукавацца трэба ўсё жыццё, інакш застанешся на ўзбочыне. Тым больш, для ўдасканалення ў сучасным грамадстве безліч умоў. Напрыклад, дыстанцыйнае навучанне. Гэта ж які крок наперад: можна спасцігаць веды, не выходзячы з дома!


ЗЯМЛЯК і вучыцца ўсё жыццё. Акрамя самаадукацыі, пасля політэхнічнага інстытута адолеў аспірантуру эканамічнага ўніверсітэта, асвоіў міжнародныя камунікацыі ў Акадэміі кіравання пры Прэзідэнце. Але гэта пазней, першае працоўнае месца свайму выхаванцу прадаставіла альма-матар. Часлава Шульгу накіравалі ў цэх ваеннай тэхнікі Мінскага аўтамабільнага завода. Неўзабаве здольнаму і ініцыятыўнаму маладому чалавеку партыйнае кіраўніцтва прапанавала пасаду ў камітэце камсамола. Шмат у той час павандраваў па Савецкім Саюзе. Падарожжы захаплялі.


Наступная пасада Часлава Шульгі стала лагічным працягам яго турыстычных памкненняў. Намеснік, а потым і генеральны дырэктар Бюро міжнароднага маладзёжнага турызму “Спутник”. Праз 15 гадоў трывалага досведу Часлава Казіміравіча прызначылі намеснікам міністра спорту і турызму Рэспублікі Беларусь:


  — Да аднаго з самых важных праектаў з маім удзелам адношу развіццё сельскага турызму. Памятаю, як вагаліся наконт мэтазгоднасці аграсядзіб. Час паказаў, што задума ўдалася. Поўнамаштабна яна пачала рэалізоўвацца ў 2006 годзе з прыняццем адпаведнага закона. Спрыялі турыстычнай ідэі льготныя пазыкі на добраўпарадкаванне. Сяльчане ацанілі магчымасці, ахвотна іх скарысталі. Па папулярнасці і колькасці аграсядзіб бачым, што сельскі турызм развіваецца і цяпер.


З 2015 года Часлаў Шульга жыве і працуе ў Смаленску. Ён старшы саветнік, кіраўнік аддзялення пасольства Рэспублікі Беларусь у Расійскай Федэрацыі. Зямляк канкрэтызуе:


— У Смаленску, як цяпер модна казаць, знаходзіцца штаб-кватэра нашага пасольства. Насамрэч яно адказвае за стасункі Беларусі з дзесяццю абласцямі Расійскай Федэрацыі. Развіваем гандлёва-эканамічныя зносіны, займаемся консульскімі і іншымі пытаннямі. Скажу важнае: нашы краіны не толькі суседнічаюць, іх насельнікі — блізкія па крыві. Бадай ва ўсіх расійскіх памежных з нашай рэспублікай абласцях жыве шмат землякоў або расіян з беларускімі каранямі. Неяк звярнуўся за інфармацыяй у смаленскі загс. Аказалася, у 80 працэнтах шлюбаў муж ці жонка — выхадцы з Беларусі. Таксама як і ў нашай краіне атабарылася шмат расіян.


Часлаў Шульга акцэнтуе ўвагу на таленавітых земляках, якія таксама лічацца агульнымі сынамі і праславілі нашых дзяржаў-сясцёр на ўвесь свет. Яркі таму прыклад — вядомы мастак Ілья Рэпін. Словам, усе мы славяне, і продкі нашы паходзяць з аднаго радаводнага дрэва.
ПАСОЛ з Туркова называе Міёршчыну залатым краем, высока ацэньвае сучасную моладзь, паважае вёску. Гэтым абумоўлена наступнае пытанне. Школы і прадпрыемствы ў малых населеных пунктах зачыняюцца, народ масава з’язджае ў горад. Як адрадзіць сельскую мясцовасць? Пасол дзеліцца меркаваннем:


— Не магу назваць сітуацыю катастрофай. Гэта маятнік, які хістаецца і некалі супакоіцца. Наступае цывілізацыя: адзін удасканалены камбайн цяпер можа замяніць 10-15 ранейшых. Прагрэс кліча за сабой, так і сучасны чалавек — паляпшае ўласнае жыццё і шукае, дзе зручней. Але тэндэнцыя нязменна рухаецца да таго, што людзі не парываюць сувязі з сельскай мясцовасцю. У мегаполісах зарабляюць грошы, а вольны час праводзяць дома — за кальцавой аўтадарогай. Як вынік, імкліва развіваюцца гарады-спадарожнікі, дзе будуецца жыллё і ўзбагачаецца інфраструктура.


Эфектыўны рэцэпт ад урбанізацыі ў адначассе Часлаў Шульга не дае, але яго парады слушныя:
— Любім патрабаваць ад дзяржавы. Яна, безумоўна, павінна ўладкоўваць жыццё грамадства, чым і займаецца. Але ж перш за ўсё кожны ў адказе за сябе і родных. А сельская мясцовасць, на маю думку, — гэта скарб нерэалізаваных магчымасцей. Па-першае, той самы турызм. Больш за 2,5 тысячы аграэкасядзіб зарэгістравана ў Беларусі — няслабая самазанятасць. Можна яшчэ больш! Думаецца, у новых ідэях, і не толькі па стварэнні сельскага турызму, дапамогуць пляцоўкі перадавога вопыту на мясцовым і замежным узроўнях. Мой тата ў 1956 годзе вярнуўся з Германіі са службы ў войску і столькі ідэй адтуль прывёз! Неўзабаве іх ажыццявіў. Навошта, напрыклад, насіць ваду з панадворка, калі можна пры дапамозе помпы яе правесці ў дом. Або парадны і рабочы ўваходы ў хаце адкуль, думаеце? З таго ж замежнага вопыту. Таму спасцігаць новае заўсёды карысна.


АКРАМЯ сельскага турызму Часлаў Шульга бачыць шмат іншых варыянтаў вясковага заробку:
— Аб’ездзіў многія раёны. У кожным знойдзецца па некалькі адмысловых і прыбытковых бізнес-праектаў. Тым самым прадпрымальнікі стварылі пад сябе працоўнае месца. Недзе вырошчваюць валяр’яну і наладзілі вытворчасць таблетак з яе. Іншыя збіраюць і рэалізоўваюць у медыцынскіх мэтах смалу. На Гарадоччыне, напрыклад, заняліся перапрацоўкай лясных ягад. Мысліць трэба глабальна і шукаць магчымасці. А яны ў беларускай глыбінцы ёсць заўсёды.


Яшчэ пасол раіць ніколі не губляць аптымізму. Менавіта гэта якасць кіруе светам і будуе гарады. Часлаў Казіміравіч вялікі патрыёт. Тройчы на тыдзень чытае беларускую класіку: Караткевіча, Быкава і ўсё, што з Радзімы. Бойка размаўляе па-беларуску, англійску. Любіць сваю сям’ю, якая жыве ў Мінску. Яна невялікая, але самы надзейны тыл. Жонка — медработнік. Сын — выпускнік эканамічнага ўніверсітэта — наладзіў турыстычны бізнес, стварыў сям’ю. Чатырохмесячны ўнучок для Часлава Казіміравіча — яшчэ адна слаўная нагода паспяшацца ў беларускую сталіцу.


Дыпламатычная місія земляку па душы. Лёс склаўся так, як і хацелася. Застаецца прыносіць плён карыснымі справамі, служыць грамадству. Па-мойму, гэта ў Часлава Казіміравіча атрымліваецца. Інакш не стаў бы дыпламатам. 

Фота з інтэрнэта.

Алена БАСІКІРСКАЯ.

рейтинг: 
Пакінуць каментар
Мы ў сацыяльных сетках
  • Камэнтуюць
  • Актуальна
  • Чытанае

Рэцыдыў

  • 09 ноябрь 2010, 11:17
  • 95 522
  • 0

Інвестыцыйны форум

  • 23 сентябрь 2011, 10:05
  • 73 974
  • 1

Злавілі рыбку, ды… залатую

  • 28 февраль 2011, 16:16
  • 41 820
  • 0

Пераброддзе 2012. Погляд вучонага

  • 31 август 2012, 15:19
  • 37 847
  • 0

  • 11 февраль 2011, 11:20
  • 36 568
  • 0

Кандыдатамі жадаюць стаць

  • 21 август 2012, 15:30
  • 34 491
  • 0

Вагон "вярнуўся"

  • 11 июнь 2013, 10:04
  • 0
  • 2

Пра тых, хто акты рэгіструе

  • 19 декабрь 2012, 09:24
  • 0
  • 2

Трагічны люты

  • 01 март 2011, 09:00
  • 23 476
  • 2
Курс валют НБРБ
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 17 февраля 2019
Александр, Алексей, Андрей, Аркадий, Борис, Василий, Георгий, Дмитрий, Иван, Иосиф, Кирилл, Михаил, Николай, Петр, Сергей, Федор, Юрий, Анна, Екатерина

Именины 16 февраля 2019
Адриан, Василий, Владимир, Иван, Михаил, Николай, Павел, Роман, Тимофей, Анна, Семен

Госці краін
free counters
Партнеры сайта